Saulo o bewa kgoši. Pitšo ya Mitsipa
1Samuele a napa a tšea sedibelwana sa setlolo a se tšhela hlogong ya Saulo, a mo atla a re: Bjale Morena o go tloditše gore o be ketapele mo nageng ye ya gagwe. 2Lehono ge o tloga mo, o tlo hlakana le banna ba babedi kua lebitleng la Rahele mollwaneng wa Benyamini kua Tselitsa; bona ba tlo go botša ba re: Dipokolo tše o bego o di nyaka di bonwe. Tatago o šetše a hlokomologile dipokolo, gomme o šetše a boifela lena; mme o re: Ke tlo reng ka baka la morwa wa ka? 3Ge o tloga moo o etla moruleng wa Thabora, o tlo gahlana le banna ba bararo ba ba rotogelago Bethele go Modimo; e mongwe o tlo ba a rwele diputšanyane tše tharo, e mongwe a rwele dinkgwa tše tharo, e mongwe a rwele lekuka la beine. 4Ba tlo go botšiša maphelo, ba go nea dinkgwa tše pedi wa di amogela. 5O tlo feta wa tla mmotong wa Modimo mo go lego bahlometši ba Bafilisita; ge o fihla motseng woo, o tlo gahlana le sehlopha sa baporofeta, ba fologa ba etšwa mmotong, ba etilwe pele ke ba diletšo le ba meropa le ba dinaka le makope, ba tšama ba porofeta. 6Ke mo le wena o tlogo tlelwa ke moya wa Morena, wa porofeta wa fetoga monna o šele. 7Ge o tlo ba o tletšwe ke dika tšona tše, gona o dire se se tlogo gahlana le seatla sa gago; gobane Modimo o tlo ba le wena. 8Gomme o nketepele o fologele Giligala; le nna ke tlo tloga ke theogela ntshe ka tla go wena gore ke hlabe dihlabelo, ke tliše didimo tša dileboga. O ntetele matšatši a šupago, ke be ke fihle ke go tsebiše se o tlogo se dira.
9Ya re ge Saulo a tloga gona moo go Samuele, Modimo a fetola pelo ya gagwe ya ba e šele; le dika tšeo tša tšwelela ka lona letšatši leo. 10Ge ba fihla Gibea, ba napa ba gahlana le sehlopha sa baporofeta. Ke mo Saulo a tletšwego ke moya wa Modimo a profeta a le gare ga bona. 11Gomme bohle ba ba bego ba mo tseba, ba botšana ba re: Se se diregetšego morwa wa Kisi ke eng? A Saulo le yena o mo gare ga baporofeta? 12E mongwe wa ntshe a fetola a re: Tatabo ke mang? Ke mo go tšwelego seema se se rego: A Saulo le yena o mo gara baporofeta?
13Ge a feditše go porofeta, a tla mmotong.
14Ngwana wa rangwanagwe a botšiša yena le lesogana la gagwe a re: Le be le ile kae?
Ba re: Re tšo nyaka dipokolo, ra di hloka; mme ra ya go Samuele.
15Ngwana wa rangwanagwe a re: A ko mpotše se Samuele a le boditšego sona.
16Saulo a fetola a re: O re boditše a re dipokolo di hweditšwe; a se mmotše tša bogoši bo Samuele a bo boletšego.
17Gomme Samuele a botha setšhaba sa Morena Mitsipa. 18A bolela le Baisiraele a re: Morena Modimo wa Isiraele o re: Ke nna ke ntšhitšego Isiraele kua Egipita. Ke le namoletše diatleng tša Baegipita, le mo diatleng tša mebušo yohle e bego e le tlaiša. 19Gomme lehono lena le lahla Modimo wa lena e a le phološitšego mo mabothateng a lena le mehlakong ya lena ka moka, gomme le mmotša le re: Re tsemele kgoši. Gomme bjale emang pele ga Morena ka meloka le ka dikgao tša lena.
20Ya re ge Samuele a batametša meloko ya Isiraele ka moka, gwa tanywa leloko la Benyamini. 21Ge go batametšwa leloko la Benyamini ka dilete tša lona, gwa tanywa ba ga Matiri, go bona gwa tšwa Saulo morwa wa Kisi. Ya re ge ba mo nyaka, ba se ke ba mmona. 22Ge ba buša ba botšiša Morena ba re: A monna eo o setla?
Morena a re: Suo, o utame gara diphahlo.
23Ba napa ba mo ntšha ntshe, ba mmea gare ga batho; mme ka leemo a feta batho ka moka, ba mo goma ka magetleng. 24Samuele a bolela le setšhaba ka moka a re: A le a mmona? Ke yena yo Morena a mo hlaotšego; ka gobane mo setšhabeng ka moka ga go na e a etšago nae.
Batho ka moka ba napa ba tšhela legoa ba re: A kgoši e phele!
25Gomme Samuele a anegela setšhaba ditshwanelo tša bogoši, a di ngwala mo lengwalong, a le bea pele ga Morena. A tsebo fa batho tsela; ka moka ba boela magaeng a bona. 26Le Saulo a boela ga gabo kua Gibea a na le banna ba bangwe ba dinatla, ba Morena a bego a kgodišitše dipelo tša bona. 27Banna ba bangwe ba dihlola ba re: A ka re thušang yena e? Ba mo nyatša, ba se ke ba mo ntšhetša sebego. Saulo a se ke a ba šetša selo.
