Tšhemo ya Nabothe. Bobe bja Isebele
1Ka morago ga tšeo gwa direga tša Nabothe wa Jeseriele. Yena o be a na le tšhemo ya merara gona moo motseng wa Jeseriele, e bapetše le ngwako wa mošate wa Ahaba kgoši ya Samaria. 2Ahaba a bolela le Nabothe a re: Nneele tšhemo ye ya gago ya merara, e be tšhemo yaka ya merogo, ka gobane e kgaufsi le ngwako wa ka. Bakeng sa yona ke tla go nea tšhemo e nngwe ya merara e phalago ye; goba, ge o rata, nka go rekela ka tšhelete ye e lekanego tšhemo ye.
3Nabothe a fetola a re: A Morena a mphemele taba yeo ya go ka go neela bohwa bja botate.
4Ahaba gomme a ikela ngwakong wa gagwe a selekegile a befetšwe ka baka la taba ye Nabothe wa Jeseriele a mmoditšego yona a re: Nka se ke ka go nea bohwa bja botate! A ya a lala malaong a gagwe a lebišitše sefahlogo moseo, a gana go ja bogobe. 5Gwa tla mosadi wa gagwe, a mo rera a re: Pelo ya gago e selekilwe ke eng? O reng o sa je bogobe?
6Ahaba a re: Ke boletše le Nabothe wa Jeseriele ka re: Nneele tšhemo ya gago ya merara, ke go rekele ka tšhelete, goba ge o rata ke tlo go nea tšhemo e nngwe bakeng sa yona; mme yena a nthera a re: Nka se go nee tšhemo yaka ya merara.
7Isebele mosadi wa gagwe a re: Wena bjale go rata gore o dire se se swanetšego kgoši mo go Isiraele! Tsoga o je bogobe, o bee pelo; tšhemo yeo ya merara ya Nabothe wa Jeseriele o tlo e newa ke nna.
8Ke moka a ngwala mangwalo ka leina la Ahaba, a a gatiša ka palamonwana ya kgoši, a a romela go bagolo le go bakgoma ba ba bego ba agile le Nabothe motseng wa gabo. 9Mangwalong ao a ngwala a re: Hlabang mokgoši wa gore go ikonwe dijo; gomme Nabothe le mo dudiše madulong a ka pele ga setšhaba. 10Le bee banna ba babedi ba dihlola, ba lebane le yena, ba hlatse ba re: Nabothe, o rogile Modimo le kgoši! Le be le mo ntšhetše ntle ga motse le mo thume ka mafsika, a hwe.
11Ke mo banna ba motse wa gabo, ba bagolo le bakgoma, ba dirilego ka mo Isebele a ba ngwaletšego ka gona mangwalong ao a a rometšego go bona. 12Ba hlaba mokgoši wa gore go ikonwe dijo; mme Nabothe ba mo dudiša madulong a pele ga setšhaba. 13Gwa tla banna ba babedi bao ba dihlola ba dula ba lebana le Nabothe; dihlola tšeo tša bea bohlatse gona moo mabatleng tša re: Nabothe o rogile Modimo le kgoši! Ke moka ba mo ntšhetša kwa ntle ga motse, ba mo thuma ka mafsika, a hwa. 14Go Isebele ba iša lentšu ba re: Nabothe o thumilwe ka mafsika; ga a sa phela!
15Ya re ge Isebele e ekwa gobane Nabothe o thumilwe ka mafsika a hwa, a bolela le Ahaba a re: Tsoga o yo tšea tšhemo yela ya Nabothe wa Jeseriele, ye a bego a gana ge o e reka ka tšhelete; gobane Nabothe ga a sa phela, o hwile. 16Ahaba ge a ekwa gore Nabothe o hwile, a tsoga, a fologela tšhemong yeo ya merara e bego e le ya Nabothe wa Jeseriele, a e tšea.
17Bjale Lentšu la Morena la tlela Eliya la re: 18Tsoga, o yo gahlana le Ahaba kgoši ya Isiraele, a lego kwa Samaria; šole, o kwa tšhemong ya merara ya Nabothe; o ile go e tšea. 19O mmotše o re: Morena o re: O bolaile motho; bjale o bile o a hlakola! O mmotše o re: Felo moo dimpya di bego di latswa madi a Nabothe, di tlo latswa le a gago madi felo moo.
20Ahaba a fetola a re: Gale o nkhweditše, wena lenaba laka!
Eliya a re: Ke go hweditše, ka gobane o itahlile wa dira tše di befelago Morena. 21Bjale ke tlo go tlišetša dikotsi, ke be ke gogole bana ba gago, ke fediše ba e lego banna mo go ba ga Ahaba, magokgolana le ba ba fahlogilego, ka ba tloša mo go Isiraele. 22Leloko la gago ke tlo le dira tše ke di dirilego leloko la Jerobeama morwa wa Nebata, le leloko la Baesa morwa wa Ahia, ka baka la borumolang bjo o nthumotšego ka bjona, wa ruta Isiraele go dira sebe.
23Isebele yena, Morena o mmolela o re: Isebele o tlo lewa ke dimpya morakong wa Jeseriele. 24Wa ga Ahaba e a tlogo hwela motseng, o tlo lewa ke dimpya; e a hwelago nageng, o tlo lewa ke manong a godimo.
25Ga go motho e a kilego a itahla bjalo ka Ahaba, a dira tše di befetšego Morena go etša yena e a bego a hlohleletšwa ke Isebele mosadi wa gagwe, 26a dira ditšhila tše kgolo ka go latela makgapha a a bego a dirwa ke Baamora bao Morena a bego a ba lelekile mola go fihla Baisiraele.
27Ya re ge Ahaba a kwile mantšu ao, a gagola diaparo tša gagwe, a apara mankgeretla, a ikona dijo, a robala a ikapešitše mankgeretla, a hlwa a eja pelo.
28Ke mo lentšu la Morena le tletšego Eliya wa Thisibe la re: 29A o bone ka mo Ahaba a ikokobetšago ka gona pele gaka? Bjale, ka ge a ikokobetša pele gaka, ke tla lesa go tliša kotsi yeo ge a sa phela; ke tlo e tliša lebakeng la morwa wa gagwe, ya wela leloko la gagwe.
