Mohlolo thabeng ya Karamele
1Gwa feta matšatši, ya ba nywaga e meraro; ke mo lentšu la Morena le tletšego Eliya la re: Sepela o yo lebana le Ahaba, ka gobane ke rata go neša pula lefaseng. 2Eliya a ya gore a lebane le Ahaba.
Tlala yona e be e le e thata nageng ya Samaria. 3Gomme Ahaba a bitša Obadya molaki wa ngwako wa gagwe. Obadya yena o be a boifa Morena gagolo. 4Gobane e kile ya re mola Isebele a bolaya baprofeta ba Morena, Obadya a tšea baprofeta ba lekgolo a ba uta mefomeng; go o mongwe a iša ba masome a fetšago seatla, a ba babalela ka bogobe le ka meetse; le go o mongwe a iša ba masome a fetšago seatla. 5Ahaba a bolela le Obadya a re: Ralala le naga le didiba tša meetse ka moka le dinoka ka moka; mohlomong re ka hwetša bjang ra phediša dipitsi le dimeila, re se felelwe ke diruiwa. 6Ba neana mahlakore a naga ba e ralala. Ahaba a tšea ka tsela ya gagwe a nnoši; Obadya le yena a tšea ka ya gagwe a nnoši.
7Ya re ge Obadya a le tseleng, a gahlana le Eliya. Obadya a mo tseba, a khunama a lotšha, a re: A ke wena Eliya mong wa ka?
8Eliya a re: Ke nna e. Botša mong wa gago o re: Eliya šo, o fa!
9Obadya a re: Ke sentšeng, ge nna mohlanka wa gago o nkgafela seatleng sa Ahaba gore a mpolaye? 10Ka bophelo bja Morena Modimo wa gago, ga go na setšhaba goba mmušo mo mong wa ka a sa kago a roma bahlanka ba go tsoma; gomme ya re ge ba boa ba re: Ga a gona mo, a eniša mmušo woo le setšhaba seo ka go re: Eliya ga a gona fa! 11Bjale o re: Sepela o botše mong wa gago o re: Eliya šo, o fa! 12Gomme e ka re ke ile, Moya wa Morena wa šala o go tloša wa go iša mo ke sa go tsebego, gomme nna ka tlo ba ke boditše Ahaba mme a tla a go hloka, gona o tlo bolaya nna; mola nna mohlanka wa gago, ke boifa Morena go tloga bofseng bja ka. 13A wena mong wa ka o ga o a botšwa tše nkilego ka di dira mehla yela ge Isebele a bolaya baporofeta ba Morena, ka mo ke utilego ba bangwe ba baporofeta ba Morena, banna ba lekgolo? Ba masome a mahlano ka ba iša mophomeng o mongwe; go o mongwe ka iša ba masome a mahlano; ka ba babalela ka bogobe le ka meetse? 14Bjale ge o re: Sepela o botše mong wa gago o re: Elia šo, o fa, a a ka lesa go mpolaya?
15Eliya a re: Ka bophelo bja Morena wa mašaba yo nna ke mo hlankelago, ke yo lebana nae e sa le lehono le.
16Ke moka Obadya a yo gahlana le Ahaba, a mmotša taba ye; Ahaba a nanoga a yo gahlana le Eliya. 17Ahaba ge a lebana le Eliya a re: A o fa wena moferekanya Isiraele?
18Eliya a re: Moferekanya Isiraele ga se nna; ke wena le leloko la geno, ka ge le lahlile melao ya Morena, mme la latela boBaali. 19Bjale roma bahlanka ba nkgobokanyetše Baisiraele ka moka thabeng ya Karamele, le baporofeta ba Baali ba makgolo a mane a masome a mahlano, le baporofeta ba makgolo a mane ba Ashera ba ba fepiwago ke Isebele.
20Ahaba a roma bahlanka ba botha Baisiraele ka moka thabeng ya Karamele, ba kgobokanya le baporofeta bao. 21Eliya a tla a lebana le setšhaba ka moka a re: Le tlo kgaotša neng go hlotšetša ka dithoko tše pedi? Ge Modimo e le Morena, gona latelang yena; ge Modimo e le Baali, gona o lateleng. Gomme setšhaba sa se ke sa fetola selo. 22Ke mo Eliya a boletšego le setšhaba a re: Nna ke šetše ke nnoši ke le moporofeta wa Morena; gomme baporofeta ba Baali ke banna ba makgolo a mane a masome a mahlano. 23Bjale re neeleng dipowana tše pedi: bona ba ikgethele powana ba e pomaganye, ba e bee dikgonyeng, mme ba se ke ba gotša mollo. Gomme nna ke tlo hlaba yela e nngwe ka e bea dikgonyeng, ka se ke ka gotša mollo. 24Lena le tlo bitša leina la modimo wa lena; ge e le nna ke tlo bitša leina la Morena. Gomme Modimo e tlo ba yeo a tlogo araba ka mollo.
Setšhaba ka moka sa fetola sa re: O boletše gabotse.
25Bjale Eliya a bolela le baporofeta ba Baali a re: Ikgetheleng powana ya lena, go thome bolena, ka gobane lena le ba bantši. Le bitše leina la modimo wa lena; fela, le se ke la gotša mollo.
26Gomme ba tšea powana ye ba e neetšwego, ba e hlaba, ba nape ba bitša leina la Baali, ba thoma, e sa le ka moswana, ya ba mosegare ba sa fela ba re: Baali, re kwe! Gomme gwa hlokwa phetolo le e a arabago, mola ba sa fela ba tibatiba, ba dikologa le aletare ye ba bego ba e dirile.
27Ya re ge e šetše e le mosegare o mogolo, Eliya a ba kwera a re: Hlabošang lentšu; ka gobane Baali ke modimo; mohlomong o kokobane a ile le mogopolo; mohlomong o ile kgakala, goba o etile; mohlomong o sa ile le boroko, o sa tlo phafoga. 28Bona ba goeletša ka mantšu a magolo, ba dira ka mokgwa wa bona ba itshegaka ka mefaka le ka marumo, ba šala le mekgeledi ya madi. 29Ge mosegare o bile o fetile, e šetše e le lebaka la sehlabelo sa sebego, ke ge ba sa na le malopo; fela, gwa hlokwa phetolo, le e a arabago, le mokwi wa dithapelo.
30Ke mo Eliya a nago a bitša setšhaba ka moka a re: Batamelang fa go nna! Setšhaba ka moka sa batamela mo a bego a le gona. Gomme Eliya a tsoša aletare ya Morena e bego e phušogile. 31A tšea maswika a lesome le metšo e mebedi ka palo ya meloko ya barwa ba Jakobo, yo a kilego a tlelwa ke lentšu la Morena la re: Leina la gago e tlo ba Isiraele. 32A aga aletare ka maswika ao, a dira leineng la Morena, a e dikološa ka lengotswana, a šia sebaka se se kago lekana go bjalwa peu ya ntlatlana tše pedi. 33A beakanya dikgong, a pomaganya powana yela a e bea dikgonyeng; 34a re: Gang meetse a meeta e mene, le a tšheleng sehlabelong le dikgonyeng. A ba a re: Boeletšang! Ge ba tšhetše, a re: Tšhelang la boraro! Mme ba tšhela la boraro. 35Aletare ya dikologwa ke meetse le lengotswana la tlala meetse.
36Ya re ge go fihlile lebaka la sehlabelo sa sebego, moporofeta Eliya a batamela, mme a re: Morena Modimo wa Aborahama le Isaka le Isiraele! Lehono tsebatša ge Modimo mo go Isiraele e le wena, le gore tše nna mohlanka wa gago ke di dirago, ke di dira ka moka ke laetšwe ke wena. 37O ko arabe, Morena! Araba, gore setšhaba se se tsebe gore Modimo ke wena Morena; gore o sokolle dipelo tša bona.
38A sa tšo realo gwa wa mollo wa Morena, wa fiša sehlabelo le dikgong le maswika le mabu, wa pšhiša meetse a mo lengotswaneng. 39Setšhaba ge se bona dilo tše, sa khunama sa inamela fase; ka moka ba re: Modimo ke Morena! Modimo ke Morena!
40Bjale Eliya a ba laela a re: Swarang baporofeta ba Baali, go se be le e a phonyokgago! Ba ba swara; Eliya a ba iša nokaneng ya Kisoni a ba bolaela ntshe.
41Ke mo Eliya a boditšego Ahaba a re: Rotoga, o je o nwe; go kwala modumo wa pula. 42Ahaba a rotoga a yo ja a nwa; Eliya yena a namela a ya ntlheng ya thaba ya Karamele, a dula fase, sefahlogo sa gagwe a se inametša mo gara matolo a gagwe. 43A roma lesogana la gagwe a re: Rotoga o lebelele thoko ya lewatle.
Lesogana la rotoga la lebelela, la re: Ga go selo! Eliya a re: Boelela, o dire gašupa. 44Gomme ka la go šupa lesogana la re: Lerunyana šelelee, le le lekanago le seatla sa motho; le rotoga le etšwa lewatleng.
Eliya a re: Sepela o botše Ahaba o re: Bofa koloi, pula e se tlo go swara.
45Ke ge legodimo le šetše le fifala ka maru le ka ledimo; gwa tla pula e kgolo. Ahaba yena o be a tlogile ka koloi a leba Jeseriele. 46Ge e le Eliya, yena seatla sa Morena se be se le godimo ga gagwe, a itlema matheka, a kitima a le pele ga Ahaba, a ba a fihla Jeseriele.
