Isiraele go buša Ela, le Simiri, le Omiri, le Ahaba
1Gomme lentšu la Modimo la tlela Jehu morwa wa Hanani ka baka la Baesa, la re: 2Nna ke go ntšhitše leroleng ka go godiša, ka go dira moetapele wa setšhaba sa ka sa Isiraele; gomme wena o swara ka tsela ya Jerobeama, o diriša setšhaba sa Isiraele sebe, gore ba nthumole ka dibe tša bona. 3Bjale o tsebe gore ke ka baka leo ke tlogo swiela bana ba Baesa, le bana ba leloko la gagwe. Leloko la gago ke tlo le dira se ke se dirilego leloko la Jerobeama morwa wa Nebata. 4Wa gaBaesa e a tlogo hwa a le motseng o tlo lewa ke dimpša; wa gabo e a tlogo hwela nageng, o tlo lewa ke manong godimo.
5Ge e le ditaba tše dingwe tša Baesa, tše a di dirilego, le tša bogale bja gagwe, naa ga di a ngwalwa mo pukung ya ditaba tša kgale tša dikgoši tša Isiraele? 6Baesa o ithobaletše le botatagwe; o bolokilwe motseng wa Thiritsa; legatong la gagwe gwa buša Ela morwa wa gagwe.
7Ge e le lentšu la Morena le le tle tšego Baesa le leloko la gagwe ka moporofeta Jehu morwa wa Hanani, le mo tletše ka baka la tšohle tše a di dirilego mme tša befela Morena, a rumola Morena ka mediro ya diatla tša gagwe, a swana le ba leloko la Jerobeama, le ka baka la ge a ba bolaile.
8Ela morwa wa Baesa o thomile go buša ka ngwaga wa masome a mabedi a metšo e selelago wa ge Asa e le kgoši ya Juda. O bušitše Isiraele a le motseng wa Thiritsa, a fetša nywaga e mebedi e le kgoši. 9O reretšwe tša bohwirihwiri ke Simiri mohlanka wa gagwe e bego e le molaodi wa sekgao se sengwe sa dikoloi. Ya re Ela a le motseng wa Thiritsa, a nwele a boiwa a le ngwakong wa Aritsa molaki wa ngwako wa gagwe wa Thiritsa, 10Simiri a tla a mo kgabutla a mmolaya. E be e le ka ngwaga wa masome a mabedi a metšo e šupago wa Asa e le kgoši ya Juda; gomme Simiri a ba kgoši legatong la Ela.
11Simiri ge e le kgoši, a dutše sedulong sa gagwe, a bolaya bohle ba leloko la Baesa, a se ke a šadiša le o tee e bego e le monna wa ba gabo le ge e le mogwera wa bona. 12Simiri a fediša bohle ba leloko la Baesa, gwa phethega lentšu la Morena le a boletšego Baesa ka lona ka moporofeta Jehu, 13ka baka la dibe ka moka tša Baesa le tša Ela morwa wa gagwe, tše ba di dirilego, mme ba diriša Isiraele sebe, ba rumola Morena Modimo wa Isiraele ka medimo ya bona ya mafela. 14Ge e le ditaba tše dingwe tša Ela, le tšohle tše a di dirilego, naa ga di a ngwalwa mo pukung ya ditaba tša kgale tša dikgoši tša Isiraele?
15E be e le ka ngwaga wa masome a mabedi a metšo e šupago wa Asa kgoši ya Juda. Simiri a na a buša matšatši a šupago fela, a le motseng wa Thiritsa mola setšhaba se le mešašeng kua Gibethoni motseng wa Bafilisita. 16Ya re setšhaba se le mešašeng, ge se ekwa gore Simiri o tsošitše moferefere a bolaya kgoši, Baisiraele ka moka ba mo mešašeng ba bea Omiri molaodi wa madira, ya ba kgoši ya Isiraele ka lona tšatši leo. 17Omiri a tsoga Gibethoni, a rotoga a na le Baisiraele ka moka, a rakelela motse wa Thiritsa. 18Simiri ge a bona motse o thopilwe, a tsena sebong sa ngwako wa kgoši, a tšhuma ngwako woo a le go wona, ya ba gona go hwa ga gagwe, 19ka baka la dibe tše a di dirilego, ge a dira tše di befetšego Morena, le ka go swara tsela ya Jerobeama ya sebe se a se dirilego a ruta Isiraele go dira sebe. 20Ge e le ditaba tše dingwe tša Simiri, le tša ge a tsoša moferefere, naa ga di a ngwalwa mo pukung ya ditaba tša kgale tša dikgoši tša Isiraele?
21Mehleng yeo setšhaba sa Isiraele se kile sa amologana; seripa sa ema le Thibini morwa wa Ginatha, seripa sa latela Omiri. 22Fela, setšhaba se se bego se latela Omiri sa feta se se bego se ema le Thibini morwa wa Ginatha. Thibini a hwa; ke moka kgoši ya ba Omiri. 23Omiri o tšere bogoši bja Isiraele ka ngwaga wa masome a mararo a motšo o tee wa Asa kgoši ya Juda, a buša a fetša nywaga e lesome le metšo e mebedi. O feditše nywaga e šupago a le motseng wa Thiritsa. 24Ke yena a rekilego thaba ya Samaria go Semere ka silifera ya Talente tše pedi, a aga motse thabeng yeo, a o reela leina la Semere mong wa thaba yeo.
25Omiri o dirile tše di befetšego Morena; e be e le yo mobe go fetiša bohle ba ba bego ba le gona pele ga gagwe. 26O be a swere ka tsela tšohle tša Jerobeama morwa wa Nebata, a dira tšona dibe tšeo tša go diriša Isiraele sebe, ba rumola Morena Modimo wa Isiraele ka medimo ya bona ya mafela. 27Ge e le ditaba tše dingwe tša Omiri, tše a di dirilego, le tše a di dirilego ka bogale bja gagwe, naa ga di a ngwalwa mo pukung ya ditaba tša kgale tša dikgoši tša Isiraele? 28Omiri o ithobaletše le botatagwe, a bolokwa Samaria; legatong la gagwe gwa buša Ahaba morwa wa gagwe.
29Ahaba morwa wa Omiri o thomile go buša Isiraele ka ngwaga wa masome a mararo a metšo e seswai wa Asa ge e le kgoši ya Juda. Ahaba morwa wa Omiri o feditše nywaga e masome a mabedi a metšo e mebedi a buša Isiraele, a le motseng wa Samaria. 30Yena Ahaba morwa wa Omiri o dirile tše di bego di befela Morena, a fetiša bohle ba ba bego ba le gona pele ga gagwe; 31a re a šetše a swere ka tsela ya dibe tša Jerobeama morwa wa Nebata, a galala a tšea Isebele morwedi wa Ethibaali kgoši ya Sidone, ya ba mosadi wa gagwe, a ya a hlankela Baali a o khunamela, 32a agela Baali aletare ngwakong wa Baali wo a bego a o agile motseng wa Samaria, 33a tsema kokwane ya Ašera, ya ba gona Ahaba a godišitšego borumolang bja go rumola Morena Modimo wa Isiraele, a fetiša dikgoši tša Isiraele ka moka tše di bego di le gona pele ga gagwe. 34Mehleng yeo ya Ahaba motse wa Jeriko o kile wa tsošwa ke Hiele wa Bethele; ya re a sa thea, a hwelwa ke morwa wa gagwe wa ntlha, Abirama; ge a sa kgokela mamati a kgoro, a hwelwa ke Segubu morwa wa gagwe e monyenyane; gwa phethega lentšu le Morena a le boletšego ka Joshua morwa wa Nuni.
