1 DIKGOŠI 14

₁Mehleng yeo gwa babja Abia morwa wa Jerobeama. ₂Jerobeama a botša mosadi wa gagwe a re: A ko tsoge o ikgakantšhe, o se tsebje ge o le mosadi wa Jerobeama; o ye kua Silo o tlo hwetša Ahia moporofeta yola wa go mpotša gore ke tlo ba kgoši ya Isiraele a le ntshe. ₃O ye o swere dinkgwa tše lesome, le dinkgwana, le legapa la dinose. O ye go yena a go tsebiše se se tlogo diregela mošimanyana yo.

₄Mosadi wa Jerobeama a dira ka mokgwa woo, a tsoga a ya Silo, a tla ngwakong wa Ahia. Gomme Ahia o be a sa bone, mahlo a gagwe a šetše a pompetše ka ge a tšofetše. ₅Gomme Morena o be a šetše a mmoditše a re: Tseba gore mosadi wa Jerobeama o tla go go botšiša ka baka la ngwana wa gagwe, gobane o a babja. O mo fetole ka la gore le la gore.

Ya ba gona mosadi ela a tsenago a ikgakantšhitše. ₆Ahia ge a ekwa mešito mojakong, a re: Tsena, mohumagadi wa Jerobeama; o reng o itira o šele? Nna ke laetšwe go go botša taba e thata. ₇Goma o yo botša Jerobeama o re: Morena Modimo wa Isiraele o re: Ke go hlaotše ka go godiša mo setšhabeng, ka go bea wa ba moetapele wa setšhaba sa ka sa Isiraele. ₈Leloko la Dafida ke le amogile mmušo ka nea wena; gomme wena wa se ke wa etša Dafida mohlanka wa ka e a bego a hlokomela ditaelo tša ka, e a bego a swere ka tsela ya go latela nna ka pelo ya gagwe ka moka, a fela a dira tše nna ke rego di lokile. ₉Wena o dirile tše mpe wa fetiša bohle ba ba bego ba le gona pele ga gago, wa itirela medimo e šele ya diswantšho, wa nthumola, wa ntahla wa fulara. ₁₀Bjale nna, leloko la Jerobeama ke tlo le tlišetša bošula ka ba ka fediša banna ka moka ba gaJerobeama, ba e sa lego magokgolana le ba ba fahlogilego. Bana ba leloko la Jerobeama ke tlo ba kgola boka maudi gwa se šale le o tee. ₁₁Wa gaJerobeama e a tlogo hwela motseng, o tlo lewa ke dimpša; e a tlogo hwela nageng, o tlo lewa ke dinong tša godimo; ka gobane Morena o realo.

₁₂Bjale tsoga o boele gae; e tlo re ge dinao tša gago di tsena motseng, ya ba mo ngwana a hwago. ₁₃Baisiraele ka moka ba tlo mo llela, ba mmoloka lebitleng. Gomme mo go ba leloko la Jerobeama ke yena fela a tlogo bolokwa lebitleng; ka gobane mo go ba gaJerobeama ke yena fela a hweditšwego a na le tše di kgahlago Morena Modimo wa Isiraele. ₁₄Gomme Morena o tlo itsemela kgoši go Isiraele, ye e tlogo fediša leloko la Jerobeama ka lona tšatši leo; mme le bjale go sa šetše eng? ₁₅Morena o tlo otla Isiraele a tlo etša lehlakanoka ge le roromela mo nokeng, a be a rake Isiraele mo nageng e botse ye a e neilego botatabo, a ba gašanyetša kua mošola wa noka, molato e le dikokwane tše ba itiretšego tšona ba rumola Morena. ₁₆Baisiraele o tlo ba lahla ka baka la dibe tša Jerobeama tše a di dirilego a ruta Isiraele go dira dibe.

₁₇Mosadi wa Jerobeama a tsoga, a sepela, a tla Thiritsa. Ya re ge a fihla serepoding sa ngwako, mošimanyana a hwa. ₁₈Ba mmoloka; Baisiraele ka moka ba mo llela; gwa phethega se Morena a se boletšego ka mohlanka wa gagwe Ahia moporofeta.

₁₉Ditaba tše dingwe tša Jerobeama, tša go hlabana le tša go buša ga gagwe di ngwadilwe mo pukung ya ditaba tša kgale tša dikgoši tša Isiraele. ₂₀Nywaga ye Jerobeama a e feditšego a le kgoši ke masome a mabedi a metšo e mebedi; a ithobalela le botatagwe. Gomme Nadaba morwa wa gagwe a buša legatong la gagwe.

₂₁Rehabeama morwa wa Salomo o be a buša Juda. Mola Rehabeama a tšea bogoši o be a na le nywaga e masome a mane a motšo o tee, a fetša nywaga e lesome le metšo e šupago a le kgoši Jerusalema motseng wo Morena a o kgethilego dileteng ka moka tša Isiraele gore a bee leina la gagwe ntshe. Leina la mmagwe e be e le Naama wa Moamoni.

₂₂Le ba Juda ba dira tše di befelago Morena, ba tsoša kgalefo ya Morena go fetiša botatabo ka dibe tše ba bego ba di dira. ₂₃Le bona ba ikagela meboto, ba itirela diswantšho le dikokwane mo mebotong ka moka le mo dihlareng tše di teteanego. ₂₄Le gona go be go na le dihlotlolo, ba dira makgapa ka moka a ditšhaba tše Morena a di rakilego mola Baisiraele ba fihla.

₂₅Ka ngwaga wa bohlano wa mmušo wa Rehabeama gwa rotoga Sisaka kgoši ya Egipita, a lwa le Jerusalema. ₂₆A tšea mahumo a ngwako wa Morena, le mahumo a ngwako wa kgoši; a tšea tšohle, le dikotse tšela tša gauta tše Salomo a di dirilego. ₂₇'Bakeng sa tšona kgoši Rehabeama a dira dikotse tša mphiri; a di laelela seatleng sa molaodi wa dikala tša go leta kgoro ya mošate. ₂₈E be e re ka mehla ge kgoši e eya ngwakong wa Morena, dikala di rwala dikotse tšeo, ka morago di di bušetše ngwakong wa dikala.

₂₉Tše dingwe ditaba tša Rehabeama, le tšohle tše a di dirilego, naa ga di a ngwalwa mo pukung ya ditaba tša kgale tša dikgoši tša Juda? ₃₀Ge e le ntwa yela ya ge Rehabeama a elwa le Jerobeama, yona e be e le gona ka mehla. ₃₁Rehabeama o ithobaletse le botatagwe; o bolokilwe le botatagwe motseng wa Dafida. Leina la mmagwe e be e le Naama wa Moamoni. Legatong la gagwe gwa buša Abiama morwa wa gagwe.