Dafida o tšofetše. Mpherefere wa Adonia. Bogoši bo tšewa ke Salomo
1Kgoši Dafida mola e le mokgalabje, a tšofetše, o be a sa ruthele, le ge ba mo apeša dikobo. 2Bahlanka ba gagwe ba bolela nae ba re: A kgoši mong wa rena a ke a tsomelwe mosetsana wa kgarebe, e a kago oka kgoši, e a fepe, a robale a e gokaretše, gore kgoši mong wa rena a ruthele. 3Ba nyaka mosetsana yo botse mo dileteng tša Isiraele ka moka; ba hwetša Abisaga wa Sunema, ba mo tliša go kgoši. 4Mosetsana eo e be e le yo botse ka kudu a tla a ba mooki wa kgoši, a e direla; fela kgoši ga ya ka ya mo tseba.
5Adonia morwa wa Hagithi o kile a tsoga a re: Kgoši e tlo ba nna! A inyakela koloi, le banamedi ba dipitsi, le banna ba masome a mahlano ba go eta pele. 6Gomme tatagwe ga a ka a ba a mo kgala mola a sa phela, a se ke a re: O reng o dira dilo tše bjalo? Le gona Adonia e be e le yo botse sebopego; o be a belegwe ke Hagithi, a hlatlama Abesalomo. 7Gomme o be a lakane le Joaba morwa wa Tseruya, le Abyathara moperisita; bona ba mo thuša, ba ema le yena. 8Ge e le Tsadoko moperisita, le Benaya morwa wa Joyada, le Nathane moporofeta, le Simei, le Rei, le bagale ba Dafida, bona ga ba ka ba ema le Adonia.
9Adonia a ya a hlaba dinku le dikgomo tše di nonnego; e be e le kua leswikeng la Segelethe sedibeng sa Rogele; a bitša bana babo barwa ba kgoši bohle, le banna ba Juda bohle ba bahlanka ba kgoši. 10A lesa go bitša Nathane moporofeta, le Benaya, le bagale, le Salomo.
11Ke mo Nathane a boletšego le Batseba mmago Salomo a re: A ga o a ka wa di kwa gobane Adonia morwa wa Hagithi o beilwe kgoši, mong wa rena Dafida a sa tsebe? 12Bjale tlaa ke go eletše gore o phološe bophelo bja gago le bophelo bja Salomo morwa wa gago. 13Yaa o tsene go kgoši o bolele o re: Kgoši mong wa ka! A ga wa ka wa enela nna molata wa gago wa re: E a tlogo ntatela bogošing ke Salomo morwa wa gago? Wa re: Ke yena a tlogo dula sedulong sa ka? Bjale ke ka baka lang ge Adonia a dirilwe kgoši? 14E tlo re ge o sa bolela le kgoši, go tlo tsena nna ke go šetše morago, gore ke tlatše polelo ya gago.
15Batseba a tsena go kgoši phapošing. Gomme kgoši e be e tšofetše gagolo, e okwa ke Abisaga wa Sunema. 16Batseba a phuhlama a lotšha; kgoši ya re: O nyakang?
17Batseba a re: Mongaka! O kile wa enela nna molata wa gago ka Morena Modimo wa gago wa re: E a tlogo ntatela bogošing ke Salomo morwa wa gago? Wa re: Ke yena a tlogo dula sedulong sa ka? 18Bjale Adonia šole, ke yena kgoši; gomme wena Kgoši mongaka ga o di tsebe. 19E bile o hlabile dipholo, le tše di nonnego, le dunku tše ntši, gomme o biditše barwa ba kgoši bohle le Abjathara moperisita, le Joaba molaodi wa dira. Ge e le Salomo mohlanka wa gago ga a ka a mo laletša. 20Bjale wena Kgoši mongaka! Mahlo a Isiraele ka moka a lebeletše wena, gore o ba tsebiše e a tlogo go latela a dula sedulong sa kgoši. 21Ge o ka lesa go dira ka mokgwa wo, gona mohla o ithobalelago le botatago, wena Kgoši mongaka, nna le Salomo ngwanake re tlo sengwa disenyi.
22Batseba a sa bolela le kgoši, gwa ba go tsena Nathane moporofeta. 23Ba botša kgoši ba re: Nathane moporofeta šo! A tsena go kgoši, a lotšha a inametše fase pele ga kgoši. 24Nathane a bolela a re: Kgoši mongaka! Afa ke wena o laetšego wa re Adonia a go latele bogošing, a dule sedulong sa gago? 25Gabone Adonia lehono o tšwele a yo hlaba dipholo, le tše di nonnego, le dinku tše ntši; gomme o biditše barwa, ba kgoši bohle, le balaodi ba dira, le Abyathara moperisita. Gomme šebala, ba a ja, ba a nwa ba šikile le yena, ba re: Kgoši Adonia a a phele! 26Ge e le nna mohlanka wa gago, le Tsadoko moperisita, le Benaya morwa wa Joyada, le Salomo mohlanka wa gago, ga a ka a re bitša. 27Ge taba ye e ka ba e tšwele go wena Kgoši, gona rena bahlanka ba gago ga wa ka wa re tsebiša e a tlogo go latela a dula sedulong sa gago, mong a rena.
28Ke mo kgoši Dafida a fetotšego a re: Bitšang Batseba a tle fa. Batseba a tsena a ema pele ga kgoši. 29Kgoši ya ena ya re: Ka bophelo bja Morena e a phološitšego moya wa ka mo dikotsing ka moka, 30lehono ke tlo dira se ke go enetšego sona ka Morena Modimo wa Isiraele ka re: Salomo morwa wa gago ke yena a tlogo ntatela bogošing, e a tlogo dula sedulong sa ka bakeng sa ka.
31Batseba a phuhlama a inamela fase a lotšha a re: A kgoši Dafida mong wa ka a phele ka go sa felego!
32Ke mo Dafida a itšego: Bitšang Tsadoko moperisita a tle fa, le Nathane moporofeta, le Benaya morwa wa Joyada. Ba bitšwa ba tla. 33Kgoši ya laela ya re: Bitšang bahlanka ba mong wa lena, ba ye le lena, mme Salomo morwa wa ka le mo nametšeng meila ya ka, le mo iše Gihone. 34Gomme Tsadoko moperisita le Nathane moporofeta ba mo tlotše le le gona kua, ba mmee kgoši ya Isiraele; gomme le letše phalafala le re: Kgoši Salomo a phele! 35Le tsebo rotoga le mo šetše nthago, a tle a dule sedulong sa ka, ka gobane ke yena a tlogo ba kgoši legatong la ka; ke beile yena gore e be moetapele wa Isiraele le Juda.
36Gwa fetola Benaya morwa wa Joyada a re: Amene! Le Morena Modimo wa Kgoši mongaka a ke a realo! 37A be le Salomo bjalo ka ge a be a na le kgoši mong wa ka; a godiše sedulo sa gagwe se be se fete sa kgoši Dafida mong wa ka.
38Ke moka Tsadoko moperisita, le Nathane moporofeta, le Benaya morwa wa Joyada, le madira a mošate, ba tšwa ba yo nametša Salomo meila ya kgoši Dafida, mme ba mo iša Gihoni. 39Tsadoko moperisita a tla a swere lenaka la setlolo sa ngwakong o mokgethwa, a tlotša Salomo. Ba napa ba letša phalafala, gomme setšhaba ka moka sa re: Kgoši Salomo a a phele! 40Bjale batho ka moka ba rotoga ba mo šetše nthago ba letša phalafala, ba thabile, e le lethabo le legolo, lefase la palega ka lehoa la bona.
41Adonia a di kwa, le bohle ba ba bego ba na nae, ba šetše ba feditše go ja. Le Joaba ge a ekwa mollo wa phalafala a re: Mekgoši yeo, le lešata leo, di reng? 42A sa realo ke ge go fihla Jonathane morwa wa Abyathara moperisita. Adonia a re: Tlaa, gobane o monna wa senatla; o tliša taba e botse.
43Jonathane a fetola a re: Go bjalo! Kgoši Dafida mong wa rena o beile Salomo kgoši. 44Kgoši e romile Tsadoko moperisita, le Nathane moporofeta, le Benaya morwa wa Joyada, le madira a mošate, ba ya ba mo nametša meila ya kgoši. 45Tsadoko moperisita, le Nathane moporofeta, ba ya ba mo tlotša a ba kgoši ba le kua Gihoni; ba rotoga ntshe ka go thaba, motse wa ka wa tlala modumo. Ke ona mašata a le a kwelego. 46Bjale Salomo o dutše sedulong sa bogoši. 47Gomme bahlanka ba kgoši le bona ba tsene ba dumediša kgoši Dafida ka ditšhegofatšo ba re: Modimo wa gago a a šetše leina la Salomo le be le fete la gago, a godiše sedulo sa gagwe se be se fete sa gago. Gomme kgoši ya lotšha e le mo dilaong, 48ya ba ya rapela ya re: A go lebogwe Morena Modimo wa Isiraele ge lehono a beile wa go dula sedulong sa ka, mme ka mmona ka mahlo a ka.
49Gomme bohle ba ba bego ba laleditšwe ke Adonia mme ba tla ba dula nae, bjale ba tsoga ba tšhogile; ba tloga bohle ba ikela mo ba yago. 50Adonia yena ka gobane a boifa Salomo, a ya a itshwarelela ka dinaka tša aletare. 51Salomo a tsebišwa gore Adonia šole o boifa kgoši Salomo; o itshwareletše ka dinaka tša aletare, mme o re: Kgoši Salomo a a nkenele gore a ka se ke a mpolaya ka lerumo, nna mohlanka wa gagwe.
52Salomo a re: Ge e ka ba ke motho wa makgonthe, gona le moriri o tee wa hlogo ya gagwe o ka se ke wa wela fase; fela, ge go ka hwetšwa bobe mo go yena, gona o tlo bolawa. 53Gomme kgoši Salomo a roma motho, a boa nae a etšwa kua aletareng. Adonia a lotšha kgoši Salomo. Salomo a mo rera a re: Yaa ngwakong wa gago.
