1 JOHANE 1

₁Re le anegela se se bego se le gona mathomong, se re se kwelego, se re se bonego ka mahlo ra se bogela, mme diatla tša rena tša se kgwatha, tša lentšu la bophelo. ₂Bophelo bjoo bo bonagetše ra bo bona, gomme re hlatsela bjona; re le anegela tša bophelo bjo bo sa felego, bjo bo bego bo le gona go Modimo Tata wešo, bja tla bja bonala mo go rena. ₃Le lena re le anegela sona seo re se bonego, se re se kwelego, gore le lena le be batee le rena; mme botee bjo bja rena e be go ba batee le Tata wešo le Morwa wa gagwe Jesu Kriste. ₄Gomme ditaba tše re le ngwalela gore thabo ya lena e be ya botlalo.

₅Gomme taba ye re e kwelego go yena, ye re le anegelago yona, ke ye e rego: Modimo ke seetša; gomme mo go yena ga go se e ka bago leswiswi. ₆Ge re re: Re batee le yena, mme ra tloga ra swara tsela ya leswiswi, gona re a aketša, ga re dire therešo. ₇Fela, ge re swere ka tsela ya seetša, boka le yena e le wa seetšeng, gona re batee seng sa rena, mme madi a Jesu Kriste Morwa wa gagwe a re hlatswa dibe tšohle.

₈Ge re ka re: Ga re na sebe, re a iphora, mme therešo ga e gona mo go rena. ₉Ge re ipolela dibe tša rena, gona ka ge yena e le wa potego le toko, o re lebalela dibe a re hlatswa bokgopo ka moka. ₁₀Ge re ka re: Ga ra dira dibe, -- gona e ka ba go mo dira wa maaka, gomme lentšu la gagwe le tla ba le se gona mo go rena.