Dikeletšo tabeng ya lenyalo
1Ge e le ka taba tšela la go nngwalela tšona ke re: Go kaone ge motho a sa kgome mosadi. 2Fela, gore go efogwe bootswa e mongwe le e mongwe a be le mosadi wa gagwe; mosadi e mongwe le e mongwe a be le monna wa gagwe. 3Monna a nee mosadi tše di mo swanetšego ka thoko ya lerato; le mosadi a dire monna wa gagwe ka mokgwa woo. 4Mosadi ga a itaole mmele, o laolwa ke monna; le monna ga a itaole mmele, o laolwa ke mosadi. 5Le se ke la hlokana, ge e se ka go kwana ka mabaka a gore le bone lebaka la go rapela, la tsebo boelana, gore Sathane a se ke a le leka ka ge le sa kgone go itshwara.
6Ge ke realo, ke bolela tše di dumelelwago; ga ke bee molao. 7Se nkago se rata ke ge batho ka moka ba ka etša nna; fela, e mongwe le e mongwe o na le neo ye Modimo a mo seditšego ka yona; e mongwe o na le ya gagwe, e mongwe le yena o na le ya gagwe.
8Ba ba sa kago ba tšea, le basadi ba bahlologadi, ke ba botša ke re: E ka ba mo go botse ge ba ka dula bjalo ka nna. 9Fela, ge ba sa kgone go itshwara, gona a ba tšee; gobane go tšea go kaone, go phala go fišega.
10Ba ba tšerego ke ba laela, e se nna, e le Morena, gore mosadi a se ke a hlala monna. 11Gomme ge a ka hlala, a itulele a sa tšewe, goba a boelane le monna wa gagwe; le monna a se ke a hlala mosadi. 12Ba bangwe ba botšwa ke nna, e se Morena, ke re: Ge modumedi a na le mosadi e a sa dumelego, mme mosadi eo a rata go dula le yena, gona a se ke a mo hlala. 13Le mosadi e a nago le monna e a sa dumelego, ge a rata go dula le monna eo, a se ke a mo hlala. 14Gobane monna e a sa dumelego o kgethegile ka mosadi; le mosadi e a sa dumelego o kgethegile ka monna. Ge go ka be go se bjalo, bana ba lena e ka be e le ba ditšhila; gomme bjale ba kgethegile. 15Ge go ka hlala e a sa dumelego, a a hlale; mme ngwana wešo goba kgaetšedi ya rena ga ba tlengwa ge go dutše bjalo. Ge e le Modimo, Yena o re biletša molaong. 16Gomme wena mosadi, o tsebang? Mohlomong o tlo phološa monna eo. Le wena monna, o tsebang? Mohlomong o tlo phološa mosadi eo.
17Se re se tsebago sese: Motho a a sware tsela ye Modimo a mo hlaoletšego yona. Diphuthegong ka moka ke ba laela ka mokgwa woo. 18Ge motho a biditšwe a bolotše, a se ke a nyaka bošoboro. Ge motho a biditšwe a sa ka a bolla, gona a lese go bolla. 19Lebollo ga se selo; le bošoboro ga se selo. Tabakgolo ke go dira se Modimo a se boletšego. 20Motho a a dule moo a hweditšwego a le gona ge a bitšwa. 21Ge o biditšwe o le mohlanka, se belaele fao, le ge o ka kgona go lokologa. Ke gona ge o tlo holega ruri. 22Gobane mohlanka e a biditšwego a ba wa Morena, ke molokollwa wa Morena, bjalo ka e a biditšwego a se mohlanka; yena e ba mohlanka wa Kriste. 23Le rekilwe ka theko e kgolo. Le se ke la ba bahlanka ba batho. 24Bana bešo! Mang le mang a a dule a le mo go tšeo a lego mo go tšona mohla a bitšwago; a itebanye le Modimo.
25Tabeng ya basetsana ga ke na molao wo o tšwago go Morena; ke fo le eletša ke le motho e a gaugetšwego ke Morena mme a botega.
26Ge ke bona mabothata a mehla yeno, ke hwetša e le botse ge motho a itulela a le bjalo. 27Ge o tlemagantšwe le mosadi, o se nyake go tlemollwa; ge o sešo wa tlemaganywa le mosadi, gona se nyake mosadi. 28Fela, ge o tšea ga o senye. Le mosetsana ge a tšewa, ga a senye. Fela, ba ba bjalo ba tlo rwala bothata nameng; mme nna ke rata go le efela.
29Ke rata go botša lena bana bešo, gore lebaka ke la pitlagano wa go re ba ba nago le basadi ba be bjalo ka ba ba se nago nabo. 30Ba ba llago ba etše ba ba sa llego. Ba ba thabago ba etše ba ba sa thabego. Ba ba rekago ba etše ba ba hlokago. 31Ba ba phelego ka tša lefase ba etše ba ba sa phelego ka tšona, gobane sebopego sa lefase leno se a loba.
32Nna ke rata ge le dula le se na dipelaelo. E a sa tšeago o belaela tša Morena, gore a kgahle Morena. 33E a tšeago o belaela tša lefase gore a kgahle mosadi. 34Mosadi e a tšerwego, le mosetsana, ga ba swane. E a sa tšewago o belaela tša Morena, gore a be mokgethwa, mmele le moya, e a tšerwego o belaela tša lefase, gore a kgahle monna.
35Ge ke realo ke rata go le hola; ga ke le kgapetše lerala molaleng; ke rata bothakga, gore go gomarela Morena go se ke gwa kgaotšwa.
36Ge go ka ba le e a bonago gore ga a dire gabotse ge a lesa ngwanenyana wa gagwe a felwa ke lebaka la bofsa bja gagwe, a bona ge go swanetše, a a dire ka mo a ratago. Ga a senye; a a tšewe. 37E a tiilego pelong ya gagwe, a se na se se mo gapeletšago, a na le maatla a go dira se a se ratago, ge pelongya gagwe a rera a re: ngwanenyana wa ka ke tlo mo lotola, o dira gabotse. 38Ke go re: E a tšeišago ngwanenyana wa gagwe o dira gabotse; fela, se se lego kaone se dirwa ke eo a sa mo tšeišego.
39Mosadi o tlemilwe ke molao lebaka ka moka la ge monna wa gagwe a sa phela. O hunologa ge monna wa gagwe a hwile; gona a ka tšewa ke e a mo ratago; fela, a e be Moreneng. 40Wa lehlogonolo ke eo a kago itulela a le bjalo. Nna ke realo ke itshema gore ke na le Moya wa Modimo.
