1 BAKORINTHE 6

₁Ge e mongwe wa lena a na le taba le e mongwe, o direlang ge a yo ahlolelwa ke ba ba sa lokago, a sa ahlolelwe ke bakgethwa? ₂A ga le tsebe gore bakgethwa ba tlo ahlola lefase? Gomme ge go ahlola lefase go loketše lena, a ga la lokelwa ke go ahlola melatwana e menyenyane? ₃A ga le tsebe gore le ba e lego Barongwa re tlo ba ahlolela? Tša bophelo bjono re tlo se di ahlole ge? ₄Bjalo ge le le ba go sekišana ka tša bophelo bjono, napang le hlaole ba e lego banyatšegi phuthegong, le ba bee baahlodi! ₅Ke realo gore ke le leše dihlong; hleng mo go lena a ke go hlokwa yo bohlale le o tee a kago kgona go le ahlolela ge le sekišana le bana beno! ₆Gomme šedi: ngwanešo o sekišana le ngwanabo, ba ba ba iša taba go ba ba sa dumelego!

₇E šetše e le bošaedi ruri ge mo go lena go na le ditsheko. Le reng le sa re: Go kaone ge nka senyegelwa! Le reng le sa re: Go kaone ge nka hlakolwa! ₈Fela, lena le dira ba bangwe bošula; lena le hlakola ba bangwe; gomme tše bjalo le di dira bana ba bolena. ₉Le gona, a ga le tsebe gobane ba ba sa lokago ba ka se be le kabelo mmušong wa Modimo? Lesang go iphora: Ba diotswa, le ba medimo e šele, le bahladi, le dhlotlolo, le ba go dira ditšhila le banna ka bona. ₁₀Le mahodu, le ba megabaru, le matagwa, le ba maroga, le bahlakodi, ba ba bjalo ga ba na kabelo mmušong wa Modimo. ₁₁Ba bangwe ba lena e be e le ba ba bjalo. Fela, le hlatswitšwe, le kgethegile, le lokafaditšwe ka leina la Morena Jesu le ka Moya wa Modimo wa rena.

₁₂Ke dumeletšwe tšohle; fela, ga se go re tšohle di a hola. Ke dumeletšwe tšohle; fela, nka se dumele go bušwa le ke se tee sa tšona. ₁₃Dijo ke tša mpa; mpa ke ya dijo. Gomme tšona tšeo Modimo o tlo di fediša. Mmele ga se wa bootswa; ke wa Morena; mmele wo, mong wa wona ke yena Morena. ₁₄Gomme Modimo ge a tsošitše Morena bahung, le rena o tlo re tsoša ka maatla a gagwe.

₁₅A ga le tsebe ge mebele ya rena e le ditho tša Kriste? Bjale ditho tša Kriste a nka di dira ditho tša bootswa? A go se be bjalo! ₁₆Le gona, a ga le tsebe gore motho e a gomarelago seotswa o ba mmele o tee le sona, ka mo go itšwego: Ka babedi e tlo ba nama e tee? ₁₇Gomme e a gomarelago Morena o ba moya o tee le yena.

₁₈Bootswa bo tšhabeng ge. Dibe tšohle tše motho a di dirago, di ntle ga mmele wa gagwe. E a dirago bootswa yena o senyetša mmele wa gagwe. ₁₉Goba, a ga le tsebe ge mebele ya lena e le Ntlogethwa ya Moyamokgethwa o lego mo go lena? Gomme ga le sa le beng ba lena beng. ₂₀Le rekilwe ka theko e kgolo. Ke gona godišang Modimo ka mebele ya lena ye Modimo e lego yena mong wa yona.