1 BAKORINTHE 4

₁A batho ba re seme bahlanka ba Kriste le balaki ba diphohlo tša Modimo. ₂Gomme se tee se se nyakwago go balaki, ke gore motho a botege. ₃Ge e le nna ke hwetša e le taba e nyenyane ge ke solwa ke bolena le ge nka solwa ka letšatši le le beilwego ke batho; hleng le nna mong ga ke ipone bosodi. ₄Ga ke itsebe selo; fela, ga se go re ke tšwa ke lokile; gobane e a nkahlolago ke Morena. ₅Le lena le se ke la bea motho molato e sešo ya ba lebaka la gona; lesang go be go tle yena Morena, e a tlogo ntšha phihlo tša leswiswi a di tšweletša seetšeng, a bonagatša menagano ya dipelo. Ke mo motho a tlogo bona yona theto ye e tšwago go Modimo.

₆Bana bešo! Ditaba tše ke di swantšhitše ka nna le Apollo, ka mo re lebanego le lena, gore le ithute ka rena go se sele mo go thwego: Go ngwadilwe: Motho a se ke a ikgogomoša a re: Nna ke ema le yo, ke lwa le yo. ₇O beilwe ke mang ge o re: Ke phala yola? O swere eng se o sa kago wa se fiwa? Gomme ge o filwe, o reng ge o ikgodiša wa e a rego: Nna ga ka fiwa?

₈Le šetše le hoše; le šetše le humile; le buša le sa re botšiše. A nka be le tseba go buša, gore le rena re tle re buše le lena! ₉Rena baapostola, ke bona eke Modimo o re beile ba moragorago, eke re ba go hwa; re sebogelo sa lefase le sa Barongwa le sa batho. ₁₀Re mašilo ka baka la Kriste; mme lena le bahlale ka Kriste. Rena re bafokodi; ba maatla ke bolena! Lena le batumišegi, banyatšegi ke borena. ₁₁Le bjale re sa le ba go bolawa ke tlala le lenyora le tšhego, re ba go otlwa, re baneneri. ₁₂Re ba go itapiša ka go dira ka diatla; ge re rogwa, re a šegofatša; ge re hlomarelwa, re a kgotlelela. ₁₃Ge re pharwa, re a fepeletša. Re bjalo ka maudi a lefase, re diphefe go bohle le lehono.

₁₄Ge ke ngwala taba tše ga se gore ke le hlabiše dihlong; ke go le eletša boka banabaratiwa. ₁₅Gobane le ge le ka ba le baruti ba diketekete ba tša Kriste, ga le na botataweno ba bantši; gobane motswadi wa lena ka Ebangedi ke nna re le ba Jesu Kriste. ₁₆Ke gona ke a le rapela, ke re le be baetši baka. ₁₇Ke ka ba ka leo ke le rometšego Timotheo, yena ngwana wa ka moratiwa, mmotegi Moreneng; ke yena a tlogo le eletša ditsela tša ka tše ke di swerego ke le wa Kriste Jesu, ka mo ke rutago gohle diphuthegong ka moka.

₁₈Ba bangwe mo go lena ba ikgogomoša ba bone ke sa tle go lena. ₁₉Fela nka se diege go tla go lena, ge Morena a rata. Gomme se ke tlogo rata go se tseba ga se dipolelo tša baikgogomoši, ke maatla a bona. ₂₀Gobane mmušo wa Modimo ga o dipolelong, o maatleng. ₂₁Se le se ratago ke eng? A ke ge nka tla ka kgati, goba ka lerato le ka moya wa boleta?