1 BAKORINTHE 12

₁Ge e le dineo tša Moya, bana bešo, ga ke rate ge le dula le sa di tsebe. ₂Le a tseba, mola le sa le bantle, le be le gogelwa medimong e šele ya dimuma, ka mo le bego le išwa ka gona. ₃Ke gona ke le botšago gore ga go motho yo e rego a na le Moya wa Modimo, a kago roga Jesu. Le gona ga go e a kago re: Jesu ke Mong wa ka, ge e se ka Moyamokgethwa.

₄Dineo tša Moya di na le mehuta; Moya wona e fo ba o tee. ₅Le mediro e na le mehuta; Moya wona e fo ba o tee. ₆Le maatla a na le mehuta; Modimo yena e fo ba o tee e a dirago tšohle go bohle. ₇E mongwe le e mongwe o fiwa se Moya o iponatšago ka sona, gore a hole ba bangwe ka sona. ₈E mongwe o fiwa polelo e bohlale ke Moya. E mongwe o fiwa polelo ya tsebo ke wona Moya woo. ₉E mongwe gape o fiwa tumelo a na le Moya woo; e mongwe o fiwa dineo tša go fodiša ka wona Moya woo. ₁₀E mongwe o fiwa go kgona mehlolo; e mongwe o fiwa boporofeta; e mongwe o fiwa maleme a mehutahuta; e mongwe a tla a fiwa tlhathollo ya maleme ao. ₁₁Gomme tšeo ka moka di dirwa ke wona Moya o tee woo, ge e mongwe le e mongwe o mo abela ka mo a ratago ka gona.

₁₂Bjalo ka ge mmele e le o tee, ditho e le tše ntši, mme ditho tšeo tša mmele o tee woo, le ge e le tše ntši, di bopa mmele o tee, le yena Kriste o bjalo. ₁₃Gobane ka moka ga rena re kolobeleditšwe go ba mmele o tee ka wona Moya o tee woo. E ka ba Bajuda, e ka ba Bagerika, e ka ba bahlanka, e ka ba bahunologi, ka moka re ba mmero o tee ka wona Moya.

₁₄Gomme mmele ga se setho se tee fela, ke ditho tše ntši. ₁₅Ge leoto le ka re: Nna ga ke letsogo; ga ke setho sa mmele, a le ka kgaogana le mmele? ₁₆Ge tsebe e ka re: Nna ga ke leihlo, ga ke setho sa mmele, a e ka kgaogana le mmele? ₁₇Ge mmele ka moka e ka fo ba leihlo fela, go kwa ga tsebe go ka tšwa kae? Ge mmele ka moka e ka fo ba tsebe fela, go dupa ga nko go ka tšwa kae? ₁₈Ditho ka moka Modimo o di beile mmeleng, se sengwe le se sengwe a se bea madulong a sona, ka mo a ratilego ka gona. ₁₉Gomme ge lebopo ka moka e ka be e le setho fela, mmele o ka be o le kae? ₂₀Bjale gomme ditho ke tše ntši, mmele e le o tee. ₂₁Leihlo ga le lahle letsogo, la re: Ga ke na taba nago! Le hlogo ga e lahle maoto ya re: Ga ke na taba le lena. ₂₂Tabakgolo ke ge ditho tše e kego ke tšona tše botlana, ya ba tše mmele o phelago ka tšona. ₂₃Tše eke tšona di nyatšegago mo mmeleng, re di apeša ka bothakga bjo bogolo; gomme tše e sego tše botše, re di apeša ka botšhepi bjo bogolo. ₂₄Ge e le ditho tše di bonatla, ga di sa nyakelwa botšhepi. Modimo ge a hlatlaganya mmele, o ratile gore setho se botlana e be sona se godišwago. ₂₅Gore mo mmeleng go se ke gwa ba le tšhitano, ditho di babalelane ka go kwana. ₂₆Ge setho se tee se hlokofala, ditho ka moka di a hlokofala. Ge setho se tee se setšwa, ditho ka moka di thaba le sona.

₂₇Bjale lena le mmele wa Kriste; ka moka le ditho mo le beilwego gona. ₂₈Ba bangwe Modimo o ba beile phuthegong; a thoma ka go bea baapostola, ba bobedi ya ba baporofeta, ba boraro ya ba baruti; a iša pele go bea ba ditiro tše maatla, a bea ba dineo tša go fodiša, le bababaledi, le balaodi, le ba polelo tša mehutahuta. ₂₉A ka moka ga bona e ka ba baapostola? A ka moka ga bona e ka ba baporofeta? A ka moka ga bona e ka ba baruti? A ka moka ga bona e ka ba ba ditiro tše maatla? ₃₀A ka moka ga bona e ka ba ba ba dineo tša go fodiša? A ka moka ga bona e ka ba ba go bolela ka maleme? A ka moka ga bona e ka ba ba go hlatholla? ₃₁Phegelelang dineo tše di phadišago tšeo, ke tle ke le bontšhe tsela e phalago dineo tšeo kgolekgole.