1 KORONIKA 18

₁Ka morago ga ditaba tše Dafida o fentše Bafilisita a ba kokobetša, a ba amoga motse wa Gathe le metsana ya gona. ₂Dafida a fenya le Bamoaba; Bamoaba ya ba bahlanka ba Dafida ba mo ntšhetša dibego.

₃Dafida a fenya le Hadada-Esere kgoši ya Tsoba thoko ya Hamathi mohla wola a ile go tiiša mmušo wa gagwe nokeng ya Forate. ₄Dafida a mo amoga dikoloi tše sekete, le banamedi ba dikete tše di šupago, le bahlabani ba dikete tše masome a mabedi; dipitsi a di ripa mešifa, a šadiša tše lekgolo tša tšona.

₅Basiria ba Damaseko ge ba tla go namolela Hadada-Esere kgoši ya Tsoba, Dafida a ba fenya a bolaya ba dikete tše masome a mabedi. ₆Mo nageng ya Siria ya Damaseko a bea bakgoma, ya ba bahlanka ba Dafida, ba mo ntšhetša dibego, gobane Morena o be a thuša Dafida mo gohle mo a yago. ₇Dafida a tšea dikotse tša gauta tše di bego di swerwe ke bahlanka ba Hadada-Esere, a di iša Jerusalema. ₈Kua Thibehathe le kua Kuni metseng ya Hadada-Esere, Dafida a tšea mphiri o montšintši ka kudu; ke wona mphiri wo Salomo a nago a dira mogopo o mogolo wola wa mphiri, le dikokwane, le dibjana tša mphiri ka wona.

₉Ya re ge Thou kgoši ya Hamathi a ekwa gore Dafida o fentše dira tša Hadada-Esere kgoši ya Tsoba, ₁₀a roma Hadorama morwa wa gagwe a tla go kgoši Dafida a mo dumediša, a mo reta ge a hlabane le Hadada-Esere mme a mo fenya, (gobane Thou o be a elwa le Hadada-Esere), a romela Dafida dibjana tša gauta le tša silifera le tša mphiri. ₁₁Le tšona Dafida o di kgethetše Morena, le disilifera le digauta tše dingwe tše a di rebotšego go ditšhaba tše dingwe, go Baedomo, le go Baamoni, le go Bafilisita, le go Baamaleke.

₁₂Abisai morwa wa Tseruya ke yena a fentšego Baedomo moeding wa letswai a bolaya ba dikete tše lesome le metšo e seswai. ₁₃Dafida a bea bakgoma mo nageng ya Edomo, Baedomo ka moka ya ba bahlanka ba Dafida, gobane Morena o be a thuša Dafida mo gohle mo a yago.

₁₄Gomme Dafida a buša Baisiraele ka moka. O be a dira ka molao, a sa hlaole motho mo go setšhaba sa gagwe ka moka. ₁₅Joaba morwa wa Tseruya e be e le yena molaodi wa dira. Josafate morwa wa Alihudi e be e le letona le legolo. ₁₆Tsadoko morwa wa Ahitobo, le Abimeleke morwa wa Abyathara, e be e le bona baperisita. Mongwadi e be e le Sausa. ₁₇Benaya morwa wa Joyada e be e le yena molaodi wa dira tša mošate. Barwa ba Dafida e be e le bahlanka ba pele ba kgoši.