Sereto sa Dafida. Baopedi le bahlapetši ba Polokelo
1Polokelo ya Modimo ba tlile nayo ba e bea ngwakwaneng wo Dafida a bego a o dirile, ba tsebo tliša dihlabelo le dileboga pele ga Modimo. 2Ya re ge Dafida a feditše go tliša dihlabelo le dileboga, a šegofatša setšhaba ka leina la Morena. 3E mongwe le e mongwe wa Baisiraele, monna le ge e le mosadi, a mo abela sesola sa bogobe le nama, le senkgwana sa makwapi a morara.
4A bea ba bangwe ba Balefi gore e be ba go hlankela polokelo ya Morena, le ba go reta Morena Modimo wa Isiraele, le go mo leboga, le go mo opelela. 5Thwadi ya bona e be e le Asafa, a hlatlangwa ke Sekaria, le Jeiele, le Semiramothe, le Gehiele, le Mathitya, le Eliaba, le Benaya, le Obede-Edomo, le Jegiele, ba swere diletšo tša metato, le makope; Asafa e be e le wa go letša dinaka. 6Benaya le Jehasiele, ba e bego e le baperisita, e be e le ba go letša diphalafala ka mehla pele ga polokelo ya kgwerano ya Modimo. 7Mohla woo ke la mathomo ge Dafida a gafela Asafa le bana babo koša ya go re: Lebogang Morena.
8Lebogang Morena! Bolang leina la gagwe!
Begelang ditšhaba tiro tša gagwe.
9Mmineleng dikoša, le mo leletše diletšo,
le kwatše mehlolo ka moka ya gagwe;
10le hlwe le kgantšha ina la gagwe le lekgethwa;
go thabe pelo tša ba nyakago Morena;
11le nyake Morena le maatla a gagwe.
Le fele le tsoma fahlogo sa gagwe.
12Gopolang mehlolo ye a e dirago,
matete a gagwe, le kahlolo tša molomo wagwe.
13Le realo, peu ya Isiraele, lena bahlanka ba gagwe,
lena bana ba Jakobo, bahlaolwa ba gagwe!
14Modimo wa rena ke yena Morena;
ke yena Mmuši wa mafase ohle.
15Le gopoleng kgwerano yagwe neng le neng,
lentšu le a le laetšego meloko ya dikete,
16a lakana le Aborahama,
a enelana le Isaka,
17a re ke molao wa ba gaJakobo,
kgwerano le Isiraele neng le neng.
18A re: Ke le nea naga ya Kanana,
ke le aroletše, ke magae a lena.
19Ke tša mola le sa le ba sego nene,
le sa diiletše gona le le babotlana,
20ba sa ralala le ditšhaba,
ba sa tšwa mmušong o mongwe, ba ya go se sengwe setšhaba.
21Ga a ka a lesa ba katwa;
a otla dikgoši, e le go ba lwela.
22O itše: Batlotšwa ba ka, le se ke la ba dira selo,
baboni ba ka, le se ke la ba šulafatša.
23Opelelang Morena! Lena ba mafase ohle,
ka mehla le mehla le bege mo a namolago.
24Le anegele ba ditšhaba borena bja gagwe,
ba dilete tšohle le ba botše mehlolo ya gagwe.
25Gobane Morena ke yena mogolo,
mmoifša mo go medimo yohle.
26Gobane ka moka medimo ya ditšhaba e fo ba medimo;
ge e le Morena, o dirile magodimo.
27O etwa pele ke letago le botšhephi;
mo ngwakong wa gagwe go ne maatla le tlhalalo.
28Lena meraforafo, le lobeng Morena,
le lobeng Morena ka direto le ka maatla.
29Le lobeng Morena ka theto tša ina la gagwe,
le rwele dibego, le tlile pele ga gagwe.
Lotšhang Morena le tšhephile ka bokgethwa.
30Lena dinaga tšohle, le hlakasele pele gagwe,
Mothealefase le se sa šišinyega.
31Magodimo a a thabe, lefase le hlalale.
A ditšhaba di re: Kgoši ke Morena!
32A watle le dume, le tšohle tša go lona,
lešoka a le nyakalale, le dinyeunya tša lona.
33Hlare tša dikgwa, hlagišang mekgolokwane pele ga Morena,
o etla go buša lefase.
34Lebogang Morena, gobane ke yo bolo,
yo botho bja neng le neng.
35Reng: Re phološe, wena Modimomorenamoledi,
re bothe, o re hlakodiše go ditšhaba,
Re leboge leina la gago lekgethwa,
re kgone go kgantšha direto tša gago.
36A go lebogwe Morena Modimo wa Isiraele,
neng le neng le ka mehla le mehla,
ka moka sa re: Amene! Reta Morena!
37Dafida a tlogela Asafa le bana babo gona fao pele ga polokelo ya kgwerano ya Morena, ba hlwa ba hlankela polokelo ka tša mehla le mehla. 38Obede-Edomo le bana babo e be e le ba masome a seswai le metšo e seswai; yena Obede-Edomo morwa wa Jeduthune, le Hosa, a ba dira baleti ba dikgoro. 39Tsadoko moperisita, le bana babo, ya ba baperisita ba ngwako wa Morena wa kua motseng wa Gibeone, 40ya ba ba go tlišetša Morena dihlabelo ka mehla aletareng ka moswana le ka mantšiboa; ka gohle ba dira ka mo go ngwadilwego molaong wa Morena wo a o laetšego Isiraele. 41Ba be ba na le Hemana le Jeduthune le ba bangwe ba ba hlaotšwego ba bolelwa maina, ya ba ba go re: Lebogang Morena, gobane ke yo bolo, yo botho bja neng le neg! 42Ba be ba na le Hemana le Jeduthune, e le ba go letša diphalafala le dinaka, le diletšo tša dikoša tša Modimo. Ge e le barwa ba Jeduthune ba be ba leta dikgoro.
43Setšhaba ka moka sa boela magaeng. Le Dafida a ya go dumediša ba ngwakong wa gagwe.
