1 KORONIKA 13

₁Dafida o kile a eletšana le balaodi ba dikgao le ba dira, le bakgoma ba bangwe. ₂A tsebiša setšhaba sa Isiraele ka moka a re: Ge le ka thabela taba ye, gomme e le taba e tšwago go Morena Modimo wa rena, gona a re napeng re e iše go bana babo rena ba thoko tšohle tša naga ka moka ya Isiraele, le go baperisita le Balefi, metseng le metsaneng, re re ba tle ba phuthegele go rena, ₃re tle re bušetše polokelo ya kgwerano ya Modimo wa rena fa go rena, gobane mehleng ya ge go buša Saulo ga ra ka ra e šetša. ₄Lekgotla ka moka la re go dirwe bjalo. Ka kgonthe ya ba taba e thabelwago ke setšhaba ka moka.

₅Gomme Dafida a botha Baisiraele bohle go goma ka noka ya Sihoro ya Egipita, le go fihla kwa Hamathi, gore ba tle ba rwale polokelo ya Morena kwa Kireathe-Hearima, ba e tliše. ₆Ke moka Dafida, a na le Baisiraele bohle, a rotogela Baala motseng wa Kireathe-Jearima wa Juda, ba yo rwala polokelo ya Modimo Morena e a dutšego godimo ga Bakerubi, e lego mo go rapelwago ina la Morena. ₇Ba rwala polokelo ya Modimo ka koloi e mpsha, ba tloga nayo lapeng la Abinadaba; Usa le Ahio ba sepediša koloi yeo. ₈Dafida le Baisiraele ka moka ba bina, ba letša diletšo ka maatla a bona ka moka pele ga Modimo, ba bina dikoša, ba letša diletšo, ba hlaba difela ba letša meropa le makope le dinaka.

₉Ya re ge ba tla seboeng sa Kidone, Usa a iša seatla a swarelela ka polokelo, ka gobane dikgomo di be di thelela. ₁₀Bogale bja Morena bja tukela Usa, a mmolaya ka gobane a iša letsogo polokelong, a hwela gona moo pele ga Modimo. ₁₁Dafida a šegama ka gobane a ubutše Usa, a mo hlothola ka mokgwa woo. Gomme leina la felo fao ya ba Peeretse-Usa le nankhono.

₁₂Dafida a tšhoga Modimo mohla woo a re: Polokelo ya Morena nka e iša bjang kua ga ka? ₁₃A lesa go e iša ga gagwe motseng wa Dafida; a e iša ngwakong wa Obede-Edomo wa Gathe. ₁₄Polokelo ya Modimo ya dula moo ngwakong wa Obede-Edomo, gwa fela dikgwedi tše tharo e le ntshe; gomme Morena a šegofatša lapa la Obede-Edomo le tšohle tše a bego a na natšo.