Dafida o bewa kgoši. Sebo sa Tsione. Bagale ba Dafida
1Baisiraele ka moka ba phuthegela go Dafida motseng wa Heburone, ba re: Hleng re selo setee le wena, re mašapo a gago, re nama ya gago. 2Go tloga bomaabane le bomaloba, mola Saulo e sa le kgoši ya Isiraele, ke wena o bego o ntšha dira o di goroše. Gomme Morena Modimo o go boditše a re: O tlo diša setšhaba sa ka sa Isiraele; a re: Ke wena o tlo ba ketapele ya setšhaba sa ka sa Isiraele. 3Le bagolo ka moka ba Isiraele ba tla go kgoši motseng wa Heburone. Dafida a dira kgwerano le bona gona moo Heburone pele ga Morena, ba mo tlotša ba mmea kgoši ya Isiraele ka mo Morena a bego a boletše ka Samuele.
4Dafida a tšwa a na le Baisiraele ka moka ba ya Jerusalema; ke wona motse wa Jebusi, mo go bego go agile Bajebusi beng ba naga yeo. 5Ba motse wa Jebusi ba be ba boditše Dafida ba re: O ka se ke wa tsena mo! Dafida a ba amoga sebo sa Tsione, ya ba Motse wa Dafida. 6Dafida o be a boletše a re: E a kago fenya Bajebusi ya ba wa mathomo, e tlo ba mokgoma le letona. Ke mo Joaba morwa wa Tseruya a nametšego pele, mme a ba mokgoma. 7Dafida a tla a dula sebong seo; ya ba gona ba o reetšego ba re ke Motse wa Dafida. 8Dafida a tsebo aga motse thoko tšohle go tloga Milo, a o agelela thoko tšohle; Joaba a o tsoša mo o bego o šaletše. 9Bogoši bja Dafida bja fela bo tielela bo eya gomme Morena wa mašaba o be a na nae.
10Seba ba dithwadi tša bagale ba ba bego ba emela Dafida mmušong wa gagwe, ge ba mmea kgoši ya Isiraele ka moka, ka mo Morena a boletšego Isiraele ka gona.
11Palo ya bagale ba Dafida še: Ke Jasobeama morwa wa Hakimone letona la ba masome a mararo; ke yena a kilego a retha tšhoša a bolaya ba makgolo a mararo ka lebaka letee. 12A hlatlangwa ke Eleasara morwa wa Dodo wa Ahohi; e be e le e mongwe wa bagale ba bararo. 13Yena o be a na le Dafida kua Pasa-Damima, mola Bafilisita ba rapile ba tla go lwa ntshe. Go be go na le serapa sa leotša, mme batho ba be ba tšhaba Bafilisita; 14ba tla ba ema mo serapeng seo, ba se amoga Bafilisita, ba ba fenya; Morena a ba fa phenyo e kgolo.
15Ge e le ba bararo ba e bego e le dithwadi mo go ba masome a mararo, ba tlile go Dafida mola a le leswikeng, mphomeng wa Adulama. Mešaša ya Bafilisita e be e le moeding wa Refaima. 16Dafida mohla woo o be a le sebong, bahlometši ba Bafilisita ba le Betlehema. 17Dafida ge a ekwa lenyora, a re: Ke mang e a kago nkgela meetse a go nwa a sediba sa kgorong ya Betlehema? 18Ke mo ba bararo bao ba hlagilego ka mo gare ga mešaša ya Bafilisita, ba ga meetse a sediba sa kgorong ya Betlehema, ba tla nao go Dafida. Fela, Dafida a gana go a nwa, a a tšhollela Morena, 19a re: A Modimo wa ka a nthibele go dira tše bjalo! Afa nka nwa madi a banna ba ba ba ilego ba lahlile bophelo bja bona? Ka gobane ba a tlišitše ba gafile bophelo bja bona. A gana go a nwa. Ke sona se se dirilwego ke bagale ba bararo bao.
20Thwadi ya bona ba bararo bao e be e le Abisai monnago Joaba; yena o kile a retha lerumo a bolaya ba makgolo a mararo, a retwa mo go ba bararo bao. 21Go ba bararo bao e be e le yena a retwago go fetiša ba babedi, a ba thwadi ya bona; fela o be a sa fihlele ba bararo bala ba pele.
22Benaya morwa wa Joyada morwa wa monna yo bogale wa tiro tše ntši, e be e le wa Kabatsiele. O kile a bolaya ditau tše pedi tše maatla kua Moaba; a ba a tsena a bolaya tau e le legageng mohla wola go nile leswela. 23Le gona o kile a bolaya monna wa Moegipita, monna e motelele ka kudu, wa leemo la meelo e mehlano. Moegipita yeo o be a swere lerumo la theko e lekanago le mpheng wa mogoma, a mo wela godimo yena a swere molamo fela; a ubula lerumo leo diatleng tša Moegipita, a mmolaya ka lona lerumo leo la gagwe. 24Ke se se dirilwego ke Benaya, a retwa mo go bagale ba bararo bao. 25Yena o be a godišwa le go bala ba masome a mararo; le ge go le bjalo ga a fihlela ba bararo bala. Dafida o mmeile a ba molaodi wa dikala tša gagwe.
26Bagale ba marumo šeba: Ke Asahele monnago Joaba, le Elihana morwa wa Dodo wa Betlehema, 27le Samothe wa Harodi, le Heletse wa Peloni, 28le Ira morwa wa Ikese wa Thekoa, le Abiesere wa Anathothe, 29le Sibekai wa Husa, le Ilai wa Ahohi, 30le Maharai wa Netofa, le Heredi morwa wa Baana wa Netofa, 31le Ithai morwa wa Ribai wa Gibea wa gaBenyamini, le Benaya wa Pirathoni, 32le Hurai wa Nahale-Gaasi, le Abiele wa Araba, 33le Asimafethe wa Bahurimi, le Eliyaheba wa Salaboni, 34le barwa ba Haseme wa Gisoni, le Jonathane morwa wa Sage wa Harari, 35le Ahiama morwa wa Sakara wa Harari, le Elifale morwa wa Uri, 36le Hefere wa Mekera, le Ahia wa Peloni, 37le Hesero wa Karamele, le Naarai morwa wa Esibai, 38le Joele ngwanabo Nathane, le Mibihara morwa wa Hagiri, 39le Tseleke Moamoni, le Naharai wa Beerothe morwadi wa marumo a Joaba morwa wa Tseruya, 40le Ira wa Jethiri, le Jaraba wa Jethiri, 41le Uria Mohethe, le Sabadi morwa wa Ahelai, 42le Adina morwa wa Sisa Morubeni e mongwe wa bakgoma ba Barubeni; o be a buša banna ba masome a mararo; 43le Hanana morwa wa Maaka, le Josafate wa Metheni, 44le Usia wa Asithera, le Sana le Jeiele barwa ba Hothama wa Aroere, 45le Jediele morwa wa Simiri, le Joha monnagwe wa Thitsi, 46le Eliele wa Mahafima, le Jeribai le Josafia barwa ba Elinaama, le Jithima Momoaba, 47le Eliele, le Obede, le Jasiele wa go tšwa Tsoba.
