2 SAMUELE 24

₁Morena a galefela Baisraele gape, gomme a hlohleletša Dafida gore a ba tshwenye. A re go yena: “Sepela o bale batho ba Israele le ba Juda.” ₂Ka gona Dafida a laela Joaba, molaodi wa madira a gagwe, a re: “Sepela le balaodi ba gago le ye dikgorong ka moka tša Israele, go akaretša naga ka moka, gomme le baleng setšhaba. Ke nyaka go tseba gore ke ba bakae.”

₃Joaba a mo fetola a re: “Kgoši, a Morena Modimo wa gago a atiše setšhaba sa Israele galekgolo, gomme nke o ka phela gore o tle o bone ge a ba atiša bjalo. Bjale ke ka lebaka lang kgoši a nyaka go bala batho?” ₄Eupša kgoši a gapeletša Joaba le balaodi ba gagwe gore ba phethe taelo ya gagwe; ba tloga go yena gomme ba ya go bala setšhaba sa Israele.

₅Ba ile ba tshela noka ya Jordane mme ba hloma mešaša ka borwa bja Aroere, motse wo o lego ka moeding, nageng ya Gade. Go tloga moo ba ya Jasere, ₆mme ba ya le kua Gileade le Kadeshe, nageng ya Bahete. Ke moka ba ya Dane, mme go tloga Dane ba arogela Sidone. ₇Go tloga moo ba ya motseng wa Tirose wo o ageleditšwego ka morako, ba fetela le metseng ya Bahibe le ya Bakanana, ba feleletša ka go ya Beresheba, ka thokong ya ka borwa ya Juda. ₈Ka gona, ka morago ga dikgwedi tše senyane le matšatši a masome a mabedi ba boela Jerusalema ba sepetše naga ka moka. ₉Ba ile ba begela kgoši palo ya banna ba e ka bago bahlabani: dikete tše makgolo a seswai mo Israele, le tše makgolo a mahlano mo Juda.

₁₀Eupša ya re ge Dafida a badile setšhaba, letswalo la thoma go mo ja, gomme a re go Morena: “Ke dirile sebe se segolo ka taba ye! Hle, ntebalele. Ke dirile tša botlaela.”

_11-12Morena a re go Gade, moprofeta wa Dafida: “Sepela o yo botša Dafida gore a ikgethele se tee dilong tše tharo tše ke tlago mmotša tšona. Ke tla dira se a se kgethago.” Ka moswane ge Dafida a tsoga, ₁₃Gade a ya go yena a mmotša se Morena a se boletšego, gomme a mmotšiša a re: “A o kgetha eng? Mengwaga ye meraro ya tlala nageng ya gago, goba dikgwedi tše tharo o fenywa ke manaba a gago, goba matšatši a mararo a bolwetši bja leuba nageng ya gago? Bjale gopodišiša taba ye, gomme o mpotše gore ke fetole yo a nthomilego ke reng.”

₁₄Dafida a mo fetola a re: “Ke mo tlalelong ye kgolo! Eupša ga ke nyake go otlwa ke batho. A Morena e be yena yo a re otlago, ka gobane o na le kgaugelo.” ₁₅Ka gona Morena a tliša bolwetši bja leuba mo Israele bjo bo ilego bja thoma mosong woo go fihlela ka nako ye a e beilego. Nageng ka moka gwa hwa Baisraele ba dikete tše masome a a šupago. ₁₆Ya re ge morongwa wa Morena a emiša letsogo gore a fediše Jerusalema, Morena a kwela batho bohloko gomme a re go morongwa yo a bego a ba bolaya: “Ema! Go lekane!” Morongwa o be a le seboeng sa Arauna, Mojebuse.

₁₇Dafida a bona morongwa yo a bego a bolaya batho, gomme a re go Morena: “Ke nna yo ke dirilego sebe. Ke nna yo ke phošitšego. Batho ba bona ba dirile eng? Otla nna le lapa la ka.”

₁₈Ka lona letšatši leo Gade a ya go Dafida a re go yena: “Rotogela mola seboeng sa Arauna gomme o agele Morena aletare fao.” ₁₉Dafida a phetha taelo ya Morena gomme a ya fao bjalo ka ge Gade a mmoditše. ₂₀Arauna ge a gadima tlase a bona kgoši le bahlankedi ba gagwe ba rotogela go yena. A mo obamela ₂₁mme a mmotšiša a re: “Kgoši, mong wa ka, o reng o tlile go nna, mohlanka wa gago?”

Dafida a mo fetola a re: “Ke tlile go reka seboa sa gago gore ke agele Morena aletare gore bolwetši bja leuba bo emišwe.”

₂₂Arauna a re: “Se tšee, kgoši, o direle Morena sehlabelo ka dikgomo tše di mo kgahlago. Dikgomo tše o ka direlago Morena dihlabelo tša go tšhungwa ka moka ka tšona šedi; dijoko tša tšona šedi le selei sa go fola, o ka di dira dikgong. ₂₃Tšohle tše, mong wa ka, ke go fa tšona, kgoši. A Morena Modimo wa gago a amogele sehlabelo sa gago.”

₂₄Eupša kgoši a mo fetola a re: “Aowa, ke tla di reka ka theko ya tšona. Nka se direle Morena Modimo wa ka dihlabelo ka tše ke sego ka di lefela selo.” Gomme a reka seboa le dikgomo ka dipapetlana tša silibera tše masome a mahlano. ₂₅A napa a agela Morena aletare, gomme a dira dihlabelo tša go tšhungwa ka moka le tša kagišano. Morena a kwa thapelo ya gagwe, gomme bolwetši bjoo bja leuba mo Israele bja emišwa.