PSALMS 124

As die Here ons nie gehelp het nie,

dit moet Israel bely,

₂as die Here ons nie gehelp het

toe mense ons aangeval het nie,

₃dan het hulle ons lewendig verslind

toe hulle woede teen ons ontvlam het;

₄dan het die waters ons weggespoel

en die vloed ons oorweldig;

₅dan het die skuimende waters ons oorweldig.

₆Aan die Here kom die lof toe:

Hy het nie toegelaat dat ons hulle prooi word nie.

₇Ons is bevry soos 'n voël uit die wip van 'n voëlvanger;

die wip het gebreek en ons was vry!

₈Ons hulp kom van die Here

wat hemel en aarde gemaak het.