PSALM 99

₁DIE Here is Koning; laat die volke bewe! Hy troon op die gérubs; laat die aarde sidder!

₂Die Here is groot in Sion, en verhewe is Hy bo al die volke.

₃Laat hulle u grote en gedugte Naam loof! Heilig is Hy!

₄Ook die sterkte van die Koning wat die reg liefhet. Ú het bevestig wat regverdig is; Ú het reg en geregtigheid gedoen in Jakob.

₅Verhef die Here onse God, en buig julle neer voor die voetbank van sy voete. Heilig is Hy!

₆Moses en Aäron was onder sy priesters, en Samuel onder die aanroepers van sy Naam. Hulle het die Here aangeroep, en Hý het hulle verhoor.

₇In die wolkkolom het Hy met hulle gespreek. Hulle het sy getuienisse onderhou en die insetting wat Hy hulle gegee het.

₈o Here onse God, Ú het hulle verhoor, U was vir hulle 'n vergewende God en Een wat wraak oefen oor hulle dade.

₉Verhef die Here onse God, en buig julle neer voor sy heilige berg. Want heilig is die Here onse God.