PSALM 98

₁'n PSALM.

Sing tot eer van die Here 'n nuwe lied, want Hy het wonders gedoen; sy regterhand en sy heilige arm het Hom gehelp.

₂Die Here het sy heil bekend gemaak, sy geregtigheid voor die oë van die nasies geopenbaar.

₃Hy het gedink aan sy goedertierenheid en sy trou aan die huis van Israel; al die eindes van die aarde het die heil van onse God gesien.

₄Juig voor die Here, o ganse aarde, breek uit en psalmsing!

₅Psalmsing tot eer van die Here met die siter, met die siter en die stem van gesang,

₆met trompette en basuingeklank; juig voor die aangesig van die Koning, die Here!

₇Laat die see bruis en sy volheid, die wêreld en die wat daarin woon.

₈Laat die riviere in die hande klap, die berge tesame jubel

₉voor die aangesig van die Here; want Hy kom om die aarde te oordeel; Hy sal die wêreld rig in geregtigheid en die volke met reg.