PSALM 96

₁SING tot eer van die Here 'n nuwe lied; sing voor die Here, o ganse aarde!

₂Sing tot eer van die Here, loof sy Naam, verkondig sy heil van dag tot dag.

₃Vertel onder die nasies sy eer, onder al die volke sy wonders.

₄Want die Here is groot en baie lofwaardig; Hy is gedug bo al die gode.

₅Want al die gode van die volke is afgode, maar die Here het die hemele gemaak.

₆Majesteit en heerlikheid is voor sy aangesig, sterkte en sieraad in sy heiligdom.

₇Gee aan die Here, o geslagte van die volke, gee aan die Here eer en sterkte.

₈Gee aan die Here die eer van sy Naam, bring offers en kom in sy voorhowe.

₉Aanbid die Here in heilige gewaad; beef voor sy aangesig, o ganse aarde!

₁₀Sê onder die volke: Die Here is Koning! Ook staan die wêreld vas, sodat dit nie wankel nie. Hy sal die volke regverdig oordeel.

₁₁Laat die hemele bly wees en die aarde juig; laat die see en sy volheid bruis.

₁₂Laat die veld juig en al wat daarin is; dan sal al die bome van die bos jubel

₁₃voor die aangesig van die Here; want Hy kom, want Hy kom om die aarde te oordeel; Hy sal die wêreld oordeel in geregtigheid en die volke in sy trou.