PSALM 92

₁'n PSALM. 'n Lied vir die sabbatdag.

₂Dit is goed om die Here te loof en tot eer van u Naam te psalmsing, o Allerhoogste,

₃om in die môre u goedertierenheid te verkondig en u getrouheid in die nagte;

₄by die tiensnarige instrument en by die harp, by snarespel op die siter.

₅Want U het my bly gemaak, Here, deur u dade; ek jubel oor die werke van u hande.

₆Hoe groot is u werke, o Here; baie diep is u gedagtes!

₇'n Dom mens weet nie, en 'n dwaas verstaan dit nie:

₈as die goddelose mense groei soos die plante en al die werkers van ongeregtigheid bloei, is dit om hulle vir ewig te verdelg.

₉Maar U is hoog verhewe tot in ewigheid, Here!

₁₀Want kyk, u vyande, o Here, want kyk, u vyande sal vergaan; al die werkers van ongeregtigheid sal verstrooi word.

₁₁Maar U verhoog my horing soos van 'n buffel; ek is met vars olie gesalf.

₁₂En my oog sien met welgevalle neer op die wat my voorlê, my ore hoor van die wat teen my as kwaaddoeners opstaan.

₁₃Die regverdige sal groei soos 'n palmboom; hy sal opgroei soos 'n seder op die Líbanon.

₁₄Geplant in die huis van die Here, sal hulle groei in die voorhowe van onse God.

₁₅In die gryse ouderdom sal hulle nog vrugte dra, hulle sal vet en groen wees,

₁₆om te verkondig dat die Here reg is, my rots, en in Hom is geen onreg nie.