PSALM 85

₁VIR die musiekleier. Van die kinders van Korag. 'n Psalm.

₂U het, o Here, 'n welbehae gehad in u land; die lot van Jakob het U verander.

₃U het die ongeregtigheid van u volk weggeneem, al hulle sonde bedek. Sela.

₄U het al u grimmigheid teruggetrek, U het U van die gloed van u toorn afgewend.

₅Herstel ons, o God van ons heil, en maak tot niet u grimmigheid teen ons!

₆Sal U vir ewig teen ons toornig wees, u toorn laat duur van geslag tot geslag?

₇Sal Ú ons nie weer lewend maak, sodat u volk in U bly kan wees nie?

₈Laat ons u goedertierenheid sien, o Here, en gee ons u heil!

₉Ek wil hoor wat God die Here spreek. Ja, Hy spreek vrede vir sy volk en vir sy gunsgenote; maar laat hulle nie tot dwaasheid terugkeer nie!

₁₀Gewis, sy heil is naby die wat Hom vrees, sodat heerlikheid in ons land kan woon.

₁₁Goedertierenheid en trou ontmoet mekaar; geregtigheid en vrede kus mekaar.

₁₂Trou spruit uit die aarde en geregtigheid kyk uit die hemel neer.

₁₃Ook gee die Here die goeie, en ons land lewer sy opbrings.

₁₄Geregtigheid gaan voor Hom uit, en dit let op die weg van sy voetstappe.