PSALM 74

₁'n ONDERWYSING van Asaf.

o God, waarom het U vir altyd verstoot? Waarom rook u toorn teen die skape van u weide?

₂Dink aan u vergadering wat U in die voortyd verwerf het, wat U verlos het om die stam van u erfdeel te wees, aan die berg Sion waar U op gewoon het.

₃Hef u voete op na die ewige puinhope: alles het die vyand in die heiligdom verniel.

₄U teëstanders het binne-in u vergaderplek gebrul; hulle het hul tekens as tekens gestel.

₅Dit lyk soos wanneer iemand byle omhoog hef in 'n digte plek bome.

₆En nou — die houtsnywerk daarvan het hulle alles met byl en hamers stukkend geslaan.

₇Hulle het u heiligdom aan die brand gesteek; tot die grond toe het hulle die woonplek van u Naam ontheilig.

₈Hulle het in hul hart gesê: Laat ons hulle almal saam onderdruk! Hulle het al die vergaderplekke van God in die land verbrand.

₉Ons sien nie ons tekens nie; daar is geen profeet meer nie, en by ons is daar niemand wat weet hoe lank nie.

₁₀Hoe lank, o God, sal die teëstander smaad aandoen, sal die vyand u Naam vir altyd verag?

₁₁Waarom trek U u hand, ja, u regterhand, terug? Trek dit uit u boesem! Vernietig!

₁₂Nogtans is God my Koning van die voortyd af, wat verlossinge werk op die aarde.

₁₃Ú het deur u sterkte die see geklief; Ú het die koppe van die seemonsters op die waters verbreek.

₁₄Ú het die koppe van die Leviátan verbrysel; U het hom gegee as voedsel vir 'n volk — vir woestyndiere.

₁₅Ú het fontein en stroom oopgeslaan; Ú het standhoudende riviere laat opdroog.

₁₆Aan U behoort die dag, aan U behoort ook die nag; Ú het hemelligte en son vasgestel.

₁₇Ú het al die grense van die aarde bepaal; somer en winter, Ú het hulle geformeer.

₁₈Dink hieraan: Die vyand het die Here gesmaad, en 'n dwase volk het u Naam verag.

₁₉Gee aan die wilde diere die siel van u tortelduif nie oor nie; vergeet nie vir altyd die lewe van u ellendiges nie.

₂₀Aanskou die verbond, want die donker plekke van die land is vol wonings van geweld.

₂₁Laat die verdrukte nie beskaamd terugkom nie; laat die ellendige en behoeftige u Naam prys.

₂₂Staan op, o God, verdedig u saak; dink aan die smaad wat U die hele dag aangedoen word deur 'n dwaas.

₂₃Vergeet nie die geroep van u teëstanders nie — die rumoer van u opstandige vyande, wat altyddeur opgaan!