PSALM 68

₁VIR die musiekleier. Van Dawid. 'n Psalm. 'n Lied.

₂God staan op, sy vyande raak verstrooid, en sy haters vlug voor sy aangesig weg!

₃Soos rook verdryf word, verdryf U hulle; soos was smelt voor die vuur, vergaan die goddelose voor die aangesig van God.

₄Maar die regverdiges is bly, hulle juig voor die aangesig van God, en hulle is vrolik met blydskap.

₅Sing tot eer van God, psalmsing tot eer van sy Naam, vul die pad op vir Hom wat deur die woestynvlaktes ry: Here is sy Naam; en jubel voor sy aangesig!

₆'n Vader van die wese en 'n regter van die weduwees is God in sy heilige woning.

₇God laat die eensames woon in 'n huisgesin, Hy lei die gevangenes uit in voorspoed; maar die wederstrewiges woon in 'n dor land.

₈o God, toe U uitgetrek het voor u volk, toe U voortgestap het in die wildernis, Sela,

₉het die aarde gebewe! Ook het die hemele gedrup voor die aangesig van God; hierdie Sinai voor die aangesig van God, die God van Israel!

₁₀Met 'n milde reën het U, o God, u erfdeel besproei; en toe dit moeg was, het Ú dit versterk.

₁₁U skare het daarin gewoon; U het dit in u goedheid berei vir die ellendige, o God!

₁₂Die Here het die woord laat hoor — die vroue wat die goeie tyding gebring het, was 'n groot skare:

₁₃Die konings van die leërskare vlug, hulle vlug; en sy wat tuis gebly het, verdeel die buit.

₁₄As julle daar lê tussen die veekrale, is die vlerke van die duif oordek met silwer en sy vleuels met liggroen goud.

₁₅Toe die Almagtige konings daarin verstrooi het, het dit gesneeu op Salmon.

₁₆'n Berg van God is die berg Basan, 'n berg met toppe is die berg Basan.

₁₇Waarom kyk julle afgunstig, o berge met toppe, na die berg wat God begeer het vir sy woning? Ja, die Here sal daar woon tot in ewigheid.

₁₈Die waens van God is tienduisende, duisend maal duisende; die Here is onder hulle; dit is Sinai in heiligheid.

₁₉U het opgeklim na die hoogte, U het gevangenes weggevoer, U het geskenke geneem onder die mense; ja, ook wederstrewiges om daar te woon, o Here God!

₂₀Geloofd sy die Here! Dag ná dag dra Hy ons; God is ons heil! Sela.

₂₁God is vir ons 'n God van verlossinge, en die Here Here het uitkomste teen die dood.

₂₂Gewis, God sal die kop van sy vyande verbrysel, die harige skedel van hom wat in sy sondeskuld rondwandel.

₂₃Die Here het gesê: Ek sal terugbring uit Basan, Ek sal terugbring uit die dieptes van die see;

₂₄sodat jy jou voet kan steek in bloed, die tong van jou honde van die vyande sy deel kan hê.

₂₅o God, hulle sien u optogte, die optogte van my God, my Koning in die heiligdom.

₂₆Vooraan gaan die sangers, daaragter die snaarspelers, tussen jongmeisies in wat die tamboeryn slaan.

₂₇Loof God, die Here, in die vergaderinge, julle wat is uit die fontein van Israel!

₂₈Daar is Benjamin, die kleinste, wat oor hulle geheers het; die vorste van Juda — hulle menigte; die vorste van Sébulon, die vorste van Náftali.

₂₉Jou God het jou sterkte gebied: betoon U sterk, o God, wat vir ons gewerk het!

₃₀Ter wille van u tempel in Jerusalem sal die konings aan U geskenke bring.

₃₁Dreig die wilde gedierte van die riet — die trop stiere saam met die kalwers van die volke — die wat hulleself onderwerp met stukke silwer. Hy het die volke verstrooi wat lus het in oorloë.

₃₂Edeles sal uit Egipte kom, Kus sal haastig sy hande uitsteek na God.

₃₃o Koninkryke van die aarde, sing tot eer van God; psalmsing tot eer van die Here! Sela.

₃₄Van Hom wat ry in die hoogste hemele, wat uit die voortyd is; kyk, Hy verhef sy stem, 'n magtige stem.

₃₅Gee sterkte aan God! Sy hoogheid is oor Israel en sy sterkte in die wolke.

₃₆Vreeslik is God uit jou heiligdomme, o Israel! Die God van Israel — Hy gee aan die volk sterkte en kragte. Geloofd sy God!