PSALM 60

₁VIR die musiekleier; op die wysie van: „Die Lelie van die Getuienis.” 'n Gedig van Dawid, om te onderrig.

₂Toe hy oorlog gevoer het teen die Arameërs van Mesopotámië en die Arameërs van Soba, en Joab teruggekom en die Edomiete verslaan het in die Soutdal, twaalfduisend.

₃o God, U het ons verstoot, ons vanmekaar geskeur; U was toornig; herstel ons!

₄U het die land laat bewe, dit gekloof; genees sy breuke, want dit wankel!

₅U het u volk harde dinge laat sien; U het ons bedwelmende wyn laat drink.

₆U het aan die wat u vrees, 'n banier gegee, om te vlug vir die boog! Sela.

₇Sodat u bemindes gered mag word; verlos deur u regterhand en verhoor ons!

₈God het gespreek in sy heiligdom: Ek wil jubel, Ek wil Sigem verdeel en die dal van Sukkot afmeet.

₉Gílead is myne en Manasse is myne, en Efraim is die beskutting van my hoof; Juda is my veldheerstaf.

₁₀Moab is my waskom; op Edom werp Ek my skoen; jubel oor My, o Filistéa!

₁₁Wie sal my bring in die versterkte stad? Wie kan my lei tot in Edom?

₁₂Het Ú, o God, ons nie verwerp nie? En U trek nie uit, o God, saam met ons leërs nie.

₁₃Verleen ons hulp teen die vyand, want die mens se hulp is ydelheid.

₁₄In God sal ons kragtige dade doen, en Hy self sal ons vyande vertrap.