PSALM 45

₁VIR die musiekleier; op die wysie van: „Lelies.” Van die kinders van Korag. 'n Onderwysing. 'n Lied van die liefde.

₂My hart word bewoë deur goeie woorde; ek dra my gedigte voor aangaande 'n Koning; my tong is die pen van 'n vaardige skrywer.

₃U is veel skoner as die mensekinders; genade is uitgestort op u lippe; daarom het God U geseën vir ewig.

₄Gord u swaard aan die heup, o held, u majesteit en u heerlikheid;

₅ja, u heerlikheid! Ry voorspoedig ter wille van waarheid en ootmoed en geregtigheid; en laat u regterhand U vreeslike dinge leer!

₆U pyle is skerp (volke val onder U!); hulle tref in die hart van die Koning se vyande.

₇U troon, o God, is vir ewig en altyd; die septer van u koninkryk is 'n regverdige septer.

₈U het geregtigheid lief en haat goddeloosheid. Daarom het, o God, u God U gesalf met vreugde-olie bo u metgeselle.

₉Al u klere is mirre en alewee en kassie; uit ivoorpaleise maak snarespel U bly.

₁₀Dogters van konings is onder u staatsdogters; die koningin staan aan u regterhand in goud van Ofir.

₁₁Hoor, o dogter, en kyk en neig u oor, en vergeet u volk en die huis van u vader;

₁₂en as die Koning u skoonheid begeer — want Hy is u Heer — buig u dan voor Hom neer.

₁₃En, o dogter van Tirus — met geskenke sal hulle u guns soek, ja, die rykstes van die mense.

₁₄Louter heerlikheid is die Koning se dogter daarbinne; van gouddraad is haar kleding.

₁₅In veelkleurige gewade word sy na die Koning gelei; jonkvroue agter haar, haar vriendinne, word na U gebring.

₁₆Hulle word gelei met vreugde en gejuig; hulle gaan in die Koning se paleis in.

₁₇In die plek van u vaders sal u seuns wees; U sal hulle aanstel as vorste in die hele land.

₁₈U Naam wil ek vermeld van geslag tot geslag; daarom sal die volke U loof vir ewig en altyd.