PSALM 25

₁ 'n PSALM van Dawid.

Alef. Tot U, o Here, hef ek my siel op.

₂Bet. My God, op U vertrou ek; laat my nie beskaamd staan nie; laat my vyande oor my nie juig nie.

₃Gimel. Ja, almal wat U verwag, sal nie beskaamd staan nie. Hulle sal beskaamd staan wat troueloos handel sonder oorsaak.

₄Dalet. Here, maak my u weë bekend; leer my u paaie.

₅He. Lei my in u waarheid en leer my, want U is die God van my heil. U verwag ek die hele dag.

₆Sajin. Dink, Here, aan u barmhartigheid en u goedertierenhede, want dié is van ewigheid af.

₇Get. Dink nie aan die sondes van my jonkheid en aan my oortredinge nie; dink aan my na u goedertierenheid, om u goedheid ontwil, o Here!

₈Tet. Die Here is goed en reg; daarom sal Hy sondaars leer aangaande die weg.

₉Jod. Hy sal die ootmoediges lei in die reg en die ootmoediges sy weg leer.

₁₀Kaf. Al die paaie van die Here is goedertierenheid en trou vir die wat sy verbond en sy getuienisse bewaar.

₁₁Lamed. Om u Naam ontwil, Here, vergeef my ongeregtigheid, want dit is groot.

₁₂Mem. Wie tog is die man wat die Here vrees? Hy sal hom leer aangaande die weg wat hy moet kies.

₁₃Noen. Hy self sal vernag in die goeie, en sy nageslag sal die land besit.

₁₄Samek. Die verborgenheid van die Here is vir die wat Hom vrees, en sy verbond om hulle dit bekend te maak.

₁₅Ajin. My oë is altyddeur op die Here, want Hý sal my voete uit die net uitlei.

₁₆Pe. Wend U tot my en wees my genadig, want ek is eensaam en ellendig.

₁₇Sade. Die benoudhede van my hart is wyd uitgestrek; lei my uit my angste.

₁₈Resj. Aanskou my ellende en my moeite, en vergeef al my sondes.

₁₉Resj. Aanskou my vyande, want hulle is talryk, en hulle haat my met 'n gewelddadige haat.

₂₀Sjin. Bewaar my siel en red my; laat my nie beskaamd staan nie, want by U skuil ek.

₂₁Tau. Laat vroomheid en opregtheid my bewaar, want U verwag ek.

₂₂o God, verlos Israel uit al sy benoudhede!