PSALM 146

₁HALLELUJA! Loof die Here, o my siel!

₂Ek wil die Here prys solank as ek lewe; ek wil psalmsing tot eer van my God solank as ek nog daar is.

₃Vertrou nie op prinse, op die mensekind, by wie geen heil is nie.

₄Sy gees gaan uit, hy keer terug na sy aarde toe; op daardie dag is dit met sy planne gedaan.

₅Welgeluksalig is hy wat die God van Jakob het as sy hulp, wie se hoop is op die Here sy God,

₆wat hemel en aarde gemaak het, die see en alles wat daarin is; wat trou bly tot in ewigheid;

₇wat aan die verdruktes reg doen, wat aan die hongeriges brood gee. Die Here maak die gevangenes los.

₈Die Here open die oë van die blindes; die Here rig die wat geboë is, op; die Here het die regverdiges lief.

₉Die Here behoed die vreemdelinge; Hy rig wees en weduwee weer op; maar die weg van die goddelose maak Hy krom.

₁₀Die Here is vir ewig Koning; jou God, o Sion, is van geslag tot geslag! Halleluja!