PSALM 14

₁VIR die musiekleier. 'n Psalm van Dawid.

Die dwaas sê in sy hart: Daar is geen God nie. Sleg, afskuwelik maak hulle hul dade; daar is niemand wat goed doen nie.

₂Die Here het uit die hemel neergesien op die mensekinders, om te sien of daar iemand verstandig is, wat na God vra.

₃Hulle het almal afgewyk, tesame het hulle ontaard; daar is niemand wat goed doen, ook nie een nie.

₄Het al die werkers van ongeregtigheid dan geen kennis nie, die wat my volk opeet asof hulle brood eet? Hulle roep die Here nie aan nie.

₅Dáár het skrik hulle oorweldig, want God is by die regverdige geslag.

₆Die raad van die ellendige — julle kan dit tot skande maak; waarlik, die Here is sy toevlug.

₇Ag, mag die verlossing van Israel uit Sion kom! As die Here die lot van sy volk verander, dan sal Jakob juig, Israel sal bly wees.