PSALM 130

₁'n BEDEVAARTSLIED.

Uit die dieptes roep ek U aan, o Here!

₂Here, hoor na my stem; laat u ore luister na die stem van my smekinge.

₃As U, Here, die ongeregtighede in gedagtenis hou, Here, wie sal bestaan?

₄Maar by U is vergewing, dat U gevrees mag word.

₅Ek wag op die Here; my siel wag, en ek hoop op sy woord.

₆My siel wag op die Here meer as wagters op die môre, wagters op die môre.

₇Wag op die Here, o Israel! want by die Here is die goedertierenheid, en by Hom is daar veel verlossing;

₈en Hy self sal Israel verlos van al sy ongeregtighede.