PSALM 105

₁LOOF die Here, roep sy Naam aan, maak onder die volke sy dade bekend.

₂Sing, psalmsing tot sy eer, spreek van al sy wonders.

₃Beroem julle in sy heilige Naam; laat die hart van die wat die Here soek, bly wees.

₄Vra na die Here en sy sterkte; soek sy aangesig altyddeur.

₅Dink aan sy wonders wat Hy gedoen het, aan sy wondertekens en die oordele van sy mond,

₆o nageslag van Abraham, sy kneg, o kinders van Jakob, sy uitverkorenes!

₇Hy, die Here, is onse God; oor die hele aarde is sy oordele.

₈Hy dink vir ewig aan sy verbond, aan die woord wat Hy ingestel het vir duisend geslagte —

₉die verbond wat Hy met Abraham gesluit het, en sy eed aan Isak;

₁₀wat Hy ook vir Jakob as insetting bekragtig het, vir Israel as 'n ewige verbond,

₁₁met die woorde: Ek sal aan jou die land Kanaän gee, julle aangewese erfdeel.

₁₂Toe hulle min mense was, min en vreemdelinge daarin,

₁₃en hulle getrek het van nasie tot nasie, van die een koninkryk na die ander volk,

₁₄het Hy geen mens toegelaat om hulle te verdruk nie; ook het Hy konings om hulle ontwil gestraf en gesê:

₁₅Raak my gesalfdes nie aan en doen my profete geen kwaad nie.

₁₆En Hy het 'n hongersnood oor die land geroep: elke staf van brood het Hy verbreek.

₁₇Hy het 'n man voor hulle uit gestuur: Josef is as slaaf verkoop.

₁₈Hulle het sy voete in boeie geknel, hy self het in die ysters gekom,

₁₉tot op die tyd dat sy woord uitgekom het, die woord van die Here hom beproef verklaar het.

₂₀Die koning het gestuur en hom losgemaak, die heerser van die volke, en hom losgelaat.

₂₁Hy het hom aangestel as heer oor sy huis en as heerser oor al sy goed;

₂₂om sy vorste te bind na sy begeerte, en aan sy oudstes moes hy wysheid leer.

₂₃Toe het Israel na Egipte gekom, en Jakob het as vreemdeling vertoef in die land van Gam.

₂₄En Hy het sy volk baie vrugbaar gemaak en dit meer versterk as sy teëstanders.

₂₅Hy het hulle hart verander, om sy volk te haat, om listig teen sy knegte te handel.

₂₆Hy het Moses, sy kneg, gestuur en Aäron wat Hy uitgekies het.

₂₇Dié het onder hulle sy aangekondigde tekens gedoen en wonders in die land van Gam.

₂₈Hy het duisternis gestuur en dit donker gemaak; en hulle was teen sy woorde nie wederstrewig nie.

₂₉Hy het hulle waters verander in bloed en hulle visse laat sterwe.

₃₀Hulle land het gewemel van paddas, in die kamers van hulle konings.

₃₁Hy het gespreek, en daar het steekvlieë gekom, muskiete in hulle hele grondgebied.

₃₂Hy het hulle reëns hael gemaak, vuurvlamme in hulle land.

₃₃En Hy het hulle wingerdstok en hulle vyeboom geslaan en die bome van hulle grondgebied verbreek.

₃₄Hy het gespreek, en daar het sprinkane gekom en voetgangers sonder getal,

₃₅wat al die plante in hulle land opgeëet het, ja, opgeëet het die vrugte van hulle grond.

₃₆Hy het ook al die eersgeborenes in hulle land getref, die eerstelinge van al hulle krag.

₃₇Toe het Hy hulle laat uitgaan met silwer en goud, en onder sy stamme was daar niemand wat struikel nie.

₃₈Egipte was bly toe hulle uittrek, want vrees vir hulle het op hulle geval.

₃₉Hy het 'n wolk uitgebrei as bedekking en vuur om die nag te verlig.

₄₀Hulle het gebid: toe laat Hy kwartels kom; en Hy het hulle versadig met hemelbrood.

₄₁Hy het 'n rots oopgemaak, en waters het gevloei; dit het geloop deur die dor plekke — 'n rivier!

₄₂Want Hy het gedink aan sy heilige woord, aan Abraham, sy kneg.

₄₃En Hy het sy volk laat uitgaan met vreugde, sy uitverkorenes met gejubel.

₄₄En Hy het aan hulle die lande van die heidene gegee, en wat deur volke met moeite verwerf is, het hulle in besit geneem,

₄₅dat hulle sy insettinge kan onderhou en sy wette bewaar. Halleluja!