LUKAS 2

₁EN in daardie dae het daar 'n bevel uitgegaan van keiser Augustus dat die hele wêreld ingeskryf moes word.

₂Hierdie eerste inskrywing het plaasgevind toe Cirénius goewerneur van Sírië was.

₃En almal het gegaan om ingeskryf te word, elkeen na sy eie stad.

₄En Josef het ook opgegaan van Galiléa, uit die stad Násaret, na Judéa, na die stad van Dawid, wat Betlehem genoem word, omdat hy uit die huis en geslag van Dawid was,

₅om hom te laat inskrywe saam met Maria, die vrou aan wie hy hom verloof het, wat swanger was.

₆En terwyl hulle daar was, is die dae vervul dat sy moes baar;

₇en sy het haar eersgebore Seun gebaar en Hom toegedraai in doeke en Hom in die krip neergelê, omdat daar vir hulle geen plek in die herberg was nie.

₈EN daar was herders in dieselfde landstreek, wat in die oop veld gebly en in die nag oor hulle skape wag gehou het.

₉En meteens staan daar 'n engel van die Here by hulle, en die heerlikheid van die Here het rondom hulle geskyn en groot vrees het hulle oorweldig.

₁₀En die engel sê vir hulle: Moenie vrees nie, want kyk, ek bring julle 'n goeie tyding van groot blydskap wat vir die hele volk sal wees,

₁₁dat vir julle vandag in die stad van Dawid gebore is die Saligmaker wat Christus, die Here, is.

₁₂En dit is vir julle die teken: julle sal 'n Kindjie vind wat in doeke toegedraai is en wat in die krip lê.

₁₃En skielik was daar saam met die engel 'n menigte van die hemelse leërskare wat God prys en sê:

₁₄Eer aan God in die hoogste hemele en vrede op aarde, in die mense 'n welbehae!

₁₅En toe die engele van hulle weggegaan het na die hemel, sê die herders vir mekaar: Laat ons dan na Betlehem gaan en hierdie ding sien wat gebeur het, wat die Here aan ons bekend gemaak het.

₁₆En hulle het met haas gegaan en Maria en Josef gevind en die kindjie wat in die krip lê.

₁₇En toe hulle dit gesien het, het hulle oral die woord bekend gemaak wat aan hulle van dié Kindjie vertel is.

₁₈En almal wat dit gehoor het, was verwonderd oor wat deur die herders aan hulle vertel is;

₁₉maar Maria het al hierdie woorde bewaar en in haar hart oordink.

₂₀En die herders het teruggegaan en God verheerlik en geprys oor alles wat hulle gehoor en gesien het, net soos aan hulle gesê is.

₂₁EN toe agt dae vervul was, dat hulle die Kindjie sou besny, het hulle Hom Jesus genoem, die naam wat deur die engel gegee is voor sy ontvangenis in die moederskoot.

₂₂En nadat die dae van haar reiniging volgens die wet van Moses vervul was, het hulle Hom na Jerusalem gebring om Hom aan die Here voor te stel,

₂₃soos geskrywe is in die wet van die Here: Elke manlike kind wat die moederskoot open, sal heilig vir die Here genoem word;

₂₄en om die offer te gee volgens wat gesê is in die wet van die Here: 'n paar tortelduiwe of twee jong duiwe.

₂₅EN daar was 'n man in Jerusalem met die naam van Símeon; en hierdie man was regverdig en vroom en het die vertroosting van Israel verwag, en die Heilige Gees was op hom.

₂₆En aan hom was dit deur die Heilige Gees geopenbaar dat hy die dood nie sou sien voordat hy die Christus van die Here gesien het nie.

₂₇En hy het deur die Gees in die tempel gekom; en toe die ouers die Kindjie Jesus inbring om met Hom te handel volgens die gebruik van die wet,

₂₈het hy Hom in sy arms geneem en God geloof en gesê:

₂₉Nou laat U, Here, u dienskneg gaan in vrede volgens u woord,

₃₀omdat my oë u heil gesien het,

₃₁wat U berei het voor die oë van al die volke —

₃₂'n lig tot verligting van die nasies en tot heerlikheid van u volk Israel.

₃₃En Josef en sy moeder het hulle verwonder oor die dinge wat van Hom gesê is.

₃₄En Símeon het hulle geseën en aan Maria, sy moeder, gesê: Kyk, hierdie Kind is bestemd tot 'n val en 'n opstanding van baie in Israel en tot 'n teken wat weerspreek sal word —

₃₅ja, 'n swaard sal deur jou eie siel gaan — sodat die gedagtes uit baie harte openbaar kan word.

₃₆En daar was Anna, 'n profetes, die dogter van Fánuel, uit die stam van Aser. Sy was op baie ver gevorderde leeftyd en het van haar maagdom af sewe jaar lank met haar man saamgelewe;

₃₇en sy was 'n weduwee van omtrent vier-en-tagtig jaar. Sy het nie weggebly van die tempel nie, en met vaste en gebede God gedien, nag en dag.

₃₈En sy het in dieselfde uur daar gekom en die Here geprys en van Hom gespreek met almal in Jerusalem wat die verlossing verwag het.

₃₉En toe hulle alles volbring het wat volgens die wet van die Here was, het hulle teruggegaan na Galiléa, na hulle stad Násaret.

₄₀En die Kindjie het gegroei en sterk geword in die Gees en vol van wysheid. En die genade van God was op Hom.

₄₁EN sy ouers was gewoond om elke jaar met die paasfees na Jerusalem te gaan.

₄₂En toe Hy twaalf jaar oud was, het hulle, volgens die gebruik van die fees, na Jerusalem opgegaan.

₄₃En nadat die feesdae vir hulle verby was, en terwyl hulle teruggaan, het die Kind Jesus in Jerusalem agtergebly; en Josef en sy moeder het dit nie geweet nie.

₄₄Maar omdat hulle gedink het dat Hy by die reisgeselskap was, het hulle 'n dagreis ver gegaan en Hom onder die familie en onder die bekendes gesoek.

₄₅En toe hulle Hom nie vind nie, het hulle teruggegaan na Jerusalem en Hom gesoek.

₄₆En ná drie dae het hulle Hom in die tempel gevind, terwyl Hy in die midde van die leraars sit en na hulle luister en hulle uitvra.

₄₇En almal wat Hom gehoor het, was verbaas oor sy verstand en sy antwoorde.

₄₈En toe hulle Hom sien, was hulle verslae. En sy moeder sê vir Hom: Kind, waarom het jy so met ons gemaak? Kyk, jou vader en ek het jou met angs gesoek.

₄₉En Hy sê vir hulle: Waarom het u My gesoek? Het u nie geweet dat Ek in die dinge van my Vader moet wees nie?

₅₀En hulle het die woord wat Hy aan hulle gesê het, nie verstaan nie.

₅₁En Hy het saam met hulle gegaan en in Násaret gekom, en Hy was hulle onderdanig. En sy moeder het al hierdie dinge in haar hart bewaar.

₅₂En Jesus het toegeneem in wysheid en grootte en in genade by God en die mense.