JOB 28

₁WANT vir die silwer is daar 'n plek waar dit uitkom, en 'n plek vir die goud wat hulle uitwas.

₂Yster word uit die grond gehaal, en koper word uit klip gegiet.

₃'n Einde maak die mens aan die duisternis, en tot die uiterste grens deursoek hy die klip van donkerheid en doodskaduwee.

₄Hy breek 'n mynskag, wég van hom wat bo woon; hulle wat vergeet is deur die voet daarbo, hulle hang ver van mense af, hulle swaai heen en weer.

₅Die aarde — daar kom brood uit voort, maar daaronder word dit omgewoel soos deur vuur.

₆Die klippe daarvan is die plek van saffiere, en dit bevat stoffies van goud.

₇'n Pad wat die roofvoël nie ken nie, en die oog van die valk het dit nie gespeur nie;

₈waar die trotse roofdiere nie op trap nie, waar die leeu nie oor stap nie.

₉Hy slaan sy hand aan die klipharde rots, hy woel die berge van die wortel af om.

₁₀In die rotse breek hy gange uit, en sy oog sien allerhande kosbare dinge.

₁₁Hy stop waterare toe, dat hulle nie drup nie; en wat verborge was, bring hy aan die lig.

₁₂MAAR die wysheid — waar word dit gevind? En waar is die plek van verstand?

₁₃Die mens ken nie die waarde daarvan nie, en dit word in die land van die lewende nie gevind nie.

₁₄Die wêreldvloed sê: In my is dit nie; en die see sê: By my is dit nie.

₁₅Fyn goud kan daarvoor nie gegee word nie, en geen silwer as koopprys daarvan afgeweeg word nie.

₁₆Die goud van Ofir weeg daar nie teen op nie, ook nie die kosbare onikssteen en saffier nie.

₁₇Goud en glas kan daarmee nie vergelyk word nie, en vir goue voorwerpe ruil 'n mens dit nie.

₁₈Korale en kristal kan nie genoem word nie, en die besit van wysheid is meer werd as korale.

₁₉Die topaas van Kus kan daarmee nie vergelyk word nie, suiwer goud word daarteen nie opgeweeg nie.

₂₀DIE wysheid dan — waar kom dit vandaan? En waar is die plek van die verstand?

₂₁Ja, dit is verborge vir die oë van alles wat leef, en weggesteek vir die voëls van die hemel.

₂₂Die plek van vertering en die dood sê: Met ons ore het ons die gerug daarvan gehoor.

₂₃God weet die weg daarheen, en Hy ken die woonplek daarvan.

₂₄Want Hý sien tot by die eindes van die aarde; alles wat onder die hemel is, aanskou Hy.

₂₅Toe Hy vir die wind die gewig bepaal en die waters met die maat afgemeet het,

₂₆toe Hy vir die reën 'n wet gestel het en 'n weg vir die onweerstraal,

₂₇toe het Hy die wysheid gesien en dit verkondig; Hy het dit opgestel en dit ook deurvors.

₂₈Maar aan die mens het Hy gesê: Kyk, die vrees van die Here is wysheid; en om van die kwaad af te wyk, is verstand.