JOB 26

₁MAAR Job het geantwoord en gesê:

₂Hoe goed het jy die onmagtige bygestaan, die kragtelose arm gehelp!

₃Hoe mooi het jy die onwyse raad gegee en beleid in oorvloed bekend gemaak!

₄Aan wie het jy woorde te kenne gegee, en wie se gees het uit jou uitgegaan?

₅Die skimme is beangs onder die waters en onder die bewoners daarvan.

₆Naak lê die doderyk voor Hom, en die plek van vertering het geen bedekking nie —

₇voor Hom wat die noorde uitspan oor die chaos, wat die aarde ophang oor 'n niks;

₈wat die waters saambind in sy wolke sonder dat die wolkgevaarte daaronder skeur;

₉wat die gesig van die troon toehou deurdat Hy sy wolk daaroor uitsprei.

₁₀Hy het 'n kring afgetrek oor die watervlakte tot waar lig in duisternis eindig.

₁₁Die pilare van die hemel wankel en staan verstom weens sy dreiging.

₁₂Deur sy krag bring Hy die see in beroering, en deur sy verstand verpletter Hy Rahab.

₁₃Deur sy asem word die hemel helder; sy hand het die vinnige slang deurboor.

₁₄Kyk, dit is maar die uitlopers van sy weë, en wat 'n fluisterwoord hoor ons maar van Hom! Wie sou dan die donder van sy magtige dade verstaan?