HEBREËRS 13

₁DIE broederliefde moet bly.

₂Vergeet die gasvryheid nie, want daardeur het sommige, sonder om dit te weet, engele as gaste geherberg.

₃Dink aan die gevangenes asof julle medegevangenes is, en aan die wat mishandel word, as mense wat self ook 'n liggaam het.

₄Laat die huwelik in alle opsigte eerbaar wees en die bed onbesmet; want God sal hoereerders en egbrekers oordeel.

₅Julle gedrag moet vry van geldgierigheid wees. Wees tevrede met wat julle het, want Hy het gesê: Ek sal jou nooit begewe en jou nooit verlaat nie.

₆Daarom kan ons met alle vrymoedigheid sê: Die Here is vir my 'n Helper, en ek sal nie vrees nie; wat sal 'n mens aan my doen?

₇Gedenk julle voorgangers wat die woord van God aan julle verkondig het; aanskou die uiteinde van hulle lewenswandel en volg hulle geloof na.

₈Jesus Christus is gister en vandag dieselfde en tot in ewigheid.

₉Moenie rondgeslinger word deur allerhande en vreemde leringe nie; want dit is goed dat die hart versterk word deur genade, nie deur voedsel nie, waarvan die wat daarin gewandel het, geen voordeel gehad het nie.

₁₀Ons het 'n altaar waarvan die wat die tabernakel bedien, geen reg het om te eet nie;

₁₁want die diere waarvan die bloed vir die sonde deur die hoëpriester in die heiligdom ingedra word — hulle liggame word buitekant die laer verbrand.

₁₂Daarom het Jesus ook, om die volk deur sy eie bloed te heilig, buitekant die poort gely.

₁₃Laat ons dan uitgaan na Hom toe buitekant die laer en sy smaad dra.

₁₄Want ons het hier geen blywende stad nie, maar ons soek die toekomstige.

₁₅Laat ons dan gedurig deur Hom aan God 'n lofoffer bring, dit is die vrug van die lippe wat sy Naam bely.

₁₆Vergeet die weldadigheid en mededeelsaamheid nie, want God het 'n welbehae aan sulke offers.

₁₇Wees gehoorsaam aan julle voorgangers en onderdanig, want hulle waak vir julle siele as diegene wat rekenskap moet gee, sodat hulle dit met blydskap kan doen en nie al sugtende nie; want dit is vir julle nie nuttig nie.

₁₈Bid vir ons, want ons is oortuig dat ons 'n goeie gewete het, omdat ons in alles goed wil wandel.

₁₉Des te meer vermaan ek julle om dit te doen, sodat ek gouer aan julle teruggegee kan word.

₂₀MAG die God van die vrede, wat die groot Herder van die skape, naamlik onse Here Jesus Christus, deur die bloed van die ewige testament uit die dode teruggebring het,

₂₁julle volmaak in elke goeie werk, om sy wil te doen, deur in julle te werk wat welbehaaglik is voor Hom deur Jesus Christus aan wie die heerlikheid toekom tot in alle ewigheid! Amen.

₂₂En ek vermaan julle, broeders, verdra die woord van vermaning, want ek het ook maar kort aan julle geskrywe.

₂₃Julle moet weet dat die broeder Timótheüs vrygelaat is, saam met wie ek julle sal sien as hy spoedig kom.

₂₄Groet al julle voorgangers en al die heiliges. Die wat van Italië is, groet julle.

₂₅Die genade sy met julle almal! Amen.