KOLOSSENSE 4

₁BETOON reg en billikheid, here, aan julle diensknegte, omdat julle weet dat julle ook 'n Here in die hemele het.

₂VOLHARD in die gebed en waak daarin met danksegging;

₃en bid tegelykertyd ook vir ons, dat God vir ons die deur van die woord mag open om te spreek van die verborgenheid van Christus, waarvoor ek ook in boeie is,

₄dat ek dit openbaar kan maak soos ek dit behoort te spreek.

₅Wandel in wysheid teenoor die wat buite is, en koop die tyd uit.

₆Laat julle woord altyd aangenaam wees, met sout besprinkel, sodat julle kan weet hoe julle iedereen moet antwoord.

₇AL my omstandighede sal Tíchikus, die geliefde broeder en getroue dienaar en mededienskneg in die Here, julle bekend maak.

₈Ek het hom na julle gestuur juis hiervoor, om julle toestande te leer ken en julle harte te vertroos,

₉saam met Onésimus, die getroue en geliefde broeder wat van julle mense is. Hulle sal julle alles bekend maak wat hier voorval.

₁₀Aristárchus, my medegevangene, groet julle; en Markus, die neef van Bárnabas, oor wie julle bevele ontvang het — as hy by julle kom, ontvang hom —

₁₁ook Jesus wat Justus genoem word, manne wat uit die besnydenis is. Hulle alleen is my medewerkers vir die koninkryk van God en hulle was 'n troos vir my.

₁₂Épafras wat een van julle is, 'n dienskneg van Christus, groet julle en stry altyd vir julle in die gebede, dat julle volmaak en volkome mag staan in die ganse wil van God.

₁₃Want ek getuig van hom dat hy 'n groot ywer het vir julle en vir die wat in Laodicéa en die wat in Hiërápolis is.

₁₄Die geneesheer Lukas, die geliefde, en Demas groet julle.

₁₅Groet die broeders in Laodicéa en Nimfas en die gemeente wat in sy huis is.

₁₆En wanneer hierdie brief by julle gelees is, sorg dat dit ook in die gemeente van die Laodicense gelees word en dat julle ook dié uit Laodicéa lees.

₁₇En sê aan Archíppus: Gee ag op die bediening wat jy ontvang het in die Here, dat jy dit vervul.

₁₈Die groete van Paulus, met my eie hand. Dink aan my boeie. Die genade sy met julle! Amen.