HANDELINGE 2

₁EN toe die dag van die pinksterfees aangebreek het, was hulle almal eendragtig bymekaar.

₂En daar kom skielik uit die hemel 'n geluid soos van 'n geweldige rukwind, en dit het die hele huis gevul waar hulle gesit het.

₃Toe is deur hulle tonge gesien soos van vuur, wat hulleself verdeel en op elkeen van hulle gaan sit.

₄En hulle is almal vervul met die Heilige Gees en het begin spreek in ander tale, soos die Gees aan hulle gegee het om uit te spreek.

₅En daar het in Jerusalem Jode gewoon, godsdienstige manne, uit elke nasie wat onder die hemel is.

₆En toe hierdie geluid kom, het die menigte saamgestroom en was in die war, want elkeen het gehoor hoe hulle in sy eie taal spreek;

₇en hulle was almal verbaas en verwonderd en sê vir mekaar: Is almal wat daar spreek, dan nie Galiléërs nie?

₈En hoe hoor ons hulle, elkeen in ons eie taal waarin ons gebore is?

₉Parthers en Meders en Elamiete en die inwoners van Mesopotámië, Judéa en Kappadócië, Pontus en Asië,

₁₀Frígië en Pamfílië, Egipte en die streke van Líbië by Ciréne, en Romeine wat hier vertoef, Jode en Jodegenote,

₁₁Kretense en Arabiere — ons hoor hulle in ons eie taal oor die groot dade van God spreek.

₁₂En hulle was almal verbaas en radeloos en sê die een vir die ander: Wat kan dit tog wees?

₁₃Maar ander het gespot en gesê: Hulle is vol soetwyn.

₁₄MAAR Petrus het opgestaan met die elf en sy stem verhef en hulle toegespreek: Joodse manne en almal wat in Jerusalem woon, dit moet julle weet, en luister na my woorde.

₁₅Hierdie mense is tog nie dronk soos julle dink nie, want dit is nog maar die derde uur in die môre.

₁₆Maar dit is wat deur die profeet Joël gespreek is:

₁₇En in die laaste dae, spreek God, sal Ek van my Gees uitstort op alle vlees, en julle seuns en julle dogters sal profeteer, en julle jongelinge sal gesigte sien, en julle ou mense sal drome droom.

₁₈En ook op my diensknegte en diensmaagde sal Ek in dié dae van my Gees uitstort, en hulle sal profeteer.

₁₉En Ek sal wonders gee bo in die hemel en tekens onder op die aarde, bloed en vuur en rookdamp.

₂₀Die son sal verander in duisternis en die maan in bloed voordat die groot en deurlugtige dag van die Here kom.

₂₁En elkeen wat die Naam van die Here aanroep, sal gered word.

₂₂Israeliete, luister na hierdie woorde! Jesus, die Nasaréner, 'n man deur God vir julle aangewys met kragte en wonders en tekens wat God deur Hom onder julle gedoen het, soos julle ook self weet —

₂₃Hom, wat deur die bepaalde raad en voorkennis van God oorgelewer is, het julle deur die hande van goddelose manne geneem en gekruisig en omgebring;

₂₄Hom het God opgewek, nadat Hy die smarte van die dood ontbind het, omdat dit onmoontlik was dat Hy daardeur vasgehou sou word.

₂₅Want Dawid sê van Hom: Ek het die Here altyddeur voor My gesien, want Hy is aan my regterhand, dat Ek nie sou wankel nie.

₂₆Daarom is my hart bly en my tong juig, ja, ook sal my vlees nog rus in hoop.

₂₇Want U sal my siel nie aan die doderyk oorlaat of u Heilige oorgee om verderwing te sien nie.

₂₈U het My die weë van die lewe bekend gemaak, U sal My vervul met vreugde by u aangesig.

₂₉Broeders, ek kan vry-uit met julle spreek oor die aartsvader Dawid, dat hy gesterf het en ook begrawe is, en sy graf is by ons tot vandag toe.

₃₀Omdat hy dan 'n profeet was en geweet het dat God vir hom met 'n eed gesweer het dat hy uit die vrug van sy lendene, wat die vlees betref, die Christus sou verwek om op sy troon te sit,

₃₁het hy, omdat hy dit vooruit gesien het, gespreek van die opstanding van Christus, dat sy siel nie in die doderyk verlaat is en sy vlees ook nie verderwing gesien het nie.

₃₂Hierdie Jesus het God opgewek, waarvan ons almal getuies is.

₃₃Nadat Hy dan deur die regterhand van God verhoog is en van die Vader die belofte van die Heilige Gees ontvang het, het Hy dít uitgestort, wat julle nou sien en hoor.

₃₄Want Dawid het nie in die hemele opgevaar nie, maar hy self sê: Die Here het gespreek tot my Here: Sit aan my regterhand

₃₅totdat Ek u vyande gemaak het 'n voetbank van u voete.

₃₆Laat dan die hele huis van Israel sekerlik weet dat God Hom Here en Christus gemaak het, hierdie Jesus wat julle gekruisig het.

₃₇TOE hulle dit hoor, is hulle diep in die hart getref en het vir Petrus en die ander apostels gesê: Wat moet ons doen, broeders?

₃₈En Petrus sê vir hulle: Bekeer julle, en laat elkeen van julle gedoop word in die Naam van Jesus Christus tot vergewing van sondes, en julle sal die gawe van die Heilige Gees ontvang.

₃₉Want die belofte kom julle toe en julle kinders en almal wat daar ver is, die wat die Here onse God na Hom sal roep.

₄₀En met baie ander woorde het hy hulle besweer en vermaan en gesê: Laat julle red uit hierdie verkeerde geslag.

₄₁Die wat toe sy woord met blydskap aangeneem het, is gedoop; en daar is op dié dag omtrent drieduisend siele toegebring.

₄₂En hulle het volhard in die leer van die apostels en in die gemeenskap en in die breking van die brood en in die gebede.

₄₃En vrees het op elkeen gekom, en baie wonders en tekens het deur die apostels plaasgevind.

₄₄En almal wat gelowig geword het, was bymekaar, en het alles gemeenskaplik besit.

₄₅En hulle eiendomme en besittings het hulle verkoop en die opbrings onder almal verdeel, volgens wat elkeen nodig gehad het.

₄₆En dag vir dag het hulle eendragtig volhard in die tempel en van huis tot huis brood gebreek en hulle voedsel met blydskap en eenvoudigheid van hart geniet,

₄₇terwyl hulle God geprys het en in guns was by die hele volk. En die Here het daagliks by die gemeente gevoeg die wat gered is.