Psalms 8

₂Here, ons Heer,

hoe magtig is u Naam

oor die hele aarde,

U wat u luister

bo die hemelruim vestig.

₃Deur die mond van kleuters en suigelinge

het U mag gevestig, vanweë u teenstanders,

om vyande en wraakgieriges stil te maak.

₄Wanneer ek na u hemelruim kyk,

die werk van u vingers,

die maan en die sterre

wat U gevestig het –

₅wat is 'n mens dan dat U aan hom dink,

'n mensekind dat U aan hom aandag skenk?

₆U het hom net minder

as 'n hemelse wese gemaak;

U het hom met eer en majesteit gekroon.

₇U laat hom heers oor die werk

van u hande;

U het alles onder sy voete gestel:

₈al die kleinvee en beeste,

ja, selfs die diere van die veld,

₉die voëls van die hemel,

en die visse van die see wat verbytrek

op hulle roetes deur die oseane.

₁₀Here, ons Heer,

hoe magtig is u Naam

oor die hele aarde!