Psalms 1

₁Gelukkig is die mens

wat nie die raad

van goddeloses volg,

nie op die pad van sondaars

gaan staan

en nie in die byeenkoms

van spotters sit nie,

₂maar wat vreugde vind

in die wet van die Here

en sy wet dag en nag

mymerend prewel.

₃So iemand sal wees soos 'n boom

geplant langs watervore,

wat sy vrugte op sy tyd gee

en waarvan die blare nie verdor nie.

Alles wat hy aanpak, gedy.

₄So is die goddeloses nie;

inteendeel, hulle is soos kaf

wat die wind wegwaai.

₅Daarom sal goddeloses nie kan opstaan

tydens die regspraak,

of sondaars in die byeenkoms

van •regverdiges nie.

₆Ja, die Here dra sorg

vir die pad van regverdiges,

maar die pad van goddeloses

loop dood.