Spreuke 25

₂Dit is tot die eer van God

om 'n saak te verberg;

en dit is tot die eer van konings

om 'n saak te deurvors.

₃Soos die hoogte van die hemel

en die diepte van die aarde,

is die hart van konings

ondeurgrondelik.

₄Verwyder die metaalskuim

uit silwer,

dan kom daar reeds 'n kruik uit

vir die silwersmid.

₅Verwyder 'n goddelose

voor die koning,

dan is sy troon reeds

in geregtigheid gevestig.

₆Moenie grootpraat voor die koning,

en moenie gaan staan

op die plek van grotes nie.

₇Want dit is beter

dat daar vir jou gesê word,

“Kom op hierheen!”

as dat jy verneder word

voor 'n vooraanstaande.

Wat jou oë gesien het,

₈moet jy nie haastig

voor die gereg bring nie;

wat sal jy uiteindelik doen

as jou medemens jou verneder?

₉Voer jou regstryd

teen jou medemens,

maar iemand anders se geheim

moet jy nie openbaar nie;

₁₀anders sal hy wat dit hoor,

jou in die skande steek,

en die skinderstories oor jou

nie ophou nie.

₁₁Goue appels in silwermonterings,

so is 'n woord uitgespreek

op die gepaste tyd.

₁₂'n Goue ring en 'n sieraad

van fyngoud,

so is 'n wyse teregwyser

vir die oor wat luister.

₁₃Soos die afkoeling deur sneeu

op 'n oesdag

is 'n betroubare boodskapper

vir die een wat hom gestuur het;

hy verkwik die siel van sy heer.

₁₄Stapelwolke en wind

sonder enige reën,

so is 'n man wat spog oor 'n geskenk

waaroor hy lieg.

₁₅Met geduld word 'n •aanvoerder

oorreed,

en 'n sagte tong breek gebeentes.

₁₆As jy heuning vind,

eet net tot jy genoeg het,

anders kry jy te veel daarvan in

en bring dit op.

₁₇Sit jou voet selde

in jou medemens se huis,

anders kry hy te veel van jou

en ontwikkel 'n weersin in jou.

₁₈'n Hamer en 'n swaard

en 'n skerp pyl,

so is iemand wat as 'n vals getuie

teen sy medemens getuig.

₁₉'n Tand wat breek en 'n voet

wat swik,

so is vertroue op 'n verraderlike

mens in 'n tyd van nood.

₂₀Soos hy wat op 'n koue dag

klere uittrek,

of asyn op soda gooi,

so is iemand wat liedere sing

vir 'n treurige hart.

₂₁As jou vyand honger is,

gee hom brood om te eet,

en as hy dors is,

gee hom water om te drink;

₂₂want jy stapel vurige kole

op sy kop,

en die Here sal jou beloon.

₂₃Die noordewind bring reën,

en 'n tong wat skinder,

verontwaardigde gesigte.

₂₄Om op die hoek van 'n dak

te woon,

is beter as om 'n huis te deel

met 'n bakleierige vrou.

₂₅Koel water in 'n dorstige keel,

so is goeie nuus uit 'n ver land.

₂₆'n Modderige fontein,

'n besoedelde bron,

so is 'n regverdige

wat swig voor 'n goddelose.

₂₇Om te veel heuning te eet,

is nie goed nie,

en die soeke na eie eer is oneervol.

₂₈'n Stad wat deurbreek is,

sonder 'n stadsmuur,

so is iemand sonder selfbeheersing.