Spreuke 2

₁My seun, as jy my woorde aanvaar,

my opdragte veilig by jou hou

₂deur aandagtig te luister

na wysheid,

jou hart te rig op verstandigheid,

₃ja, as jy om insig roep,

hardop roep om verstandigheid,

₄ as jy dit nastreef soos silwer,

dit soos 'n verborge skat naspeur,

₅dan sal jy insig hê in ontsag

vir die Here,

en kennis van God sal jy vind.

₆Ja, net die Here gee wysheid,

uit sy mond kom kennis

en verstandigheid.

₇Vir die opregtes hou Hy

vindingrykheid in bewaring,

as 'n skild vir hulle

wat onberispelik leef,

₈deurdat Hy die paaie

van die reg bewaak;

die pad van sy getroue volgelinge

beskerm Hy.

₉Dan sal jy verstaan

wat regverdig, billik en reg is –

elke goeie pad.

₁₀Want wysheid

sal in jou hart inkom,

en kennis sal vir jou aangenaam wees.

₁₁Goeie oordeel sal oor jou wag hou,

verstandigheid sal jou bewaak

₁₂om jou te red

van die pad van onheil,

van iemand wat verdorwe

uitsprake maak,

₁₃van hulle wat reguit paaie

verlaat om op donker weë te gaan,

₁₄van hulle wat vreugde daarin

vind om kwaad te doen,

wat juig oor die verdorwenheid

van die kwaad,

₁₅hulle wie se paaie verdraai is,

en wat die spoor byster is

op hulle roetes,

₁₆en om jou te red

van 'n vreemde vrou,

van die uitlander met haar vleitaal,

₁₇wat die boesemvriend

van haar jeug verlaat,

die verbond van haar God vergeet.

₁₈Ja, na die dood sak haar huis af,

na die skimme haar spore.

₁₉Almal wat na haar gaan –

hulle keer nie terug nie,

hulle bereik nie weer die paaie

van die lewe nie.

₂₀Dus, jy moet die pad

van goeie mense loop,

en die weë van regverdiges –

daarby moet jy hou.

₂₁Want opregtes

sal die land bewoon,

en wie onberispelik is,

sal daarin agterbly.

₂₂Maar die goddeloses

sal uit die land uitgeroei word,

en wie verraderlik optree,

sal daaruit weggeruk word.