Levitikus 14

₁Die Here het met Moses gepraat en vir hom gesê: ₂“Dit is die voorskrifte wat geld vir iemand met velsiekte op die dag van sy reiniging: Hy moet na die priester gebring word. ₃Die priester moet na hom toe uitgaan buite die kamp. Die priester moet hom ondersoek en as hy vind dat die aangetaste persoon van velsiekte genees is, ₄moet hy opdrag gee dat twee lewendige rein voëls, 'n stukkie sederhout, 'n karmosynrooi toutjie en 'n marjoleintakkie gebring word vir die een wat hom wil laat reinig. ₅Die priester moet opdrag gee dat die een voël se kop oor 'n kleipot met vars water afgesny word. ₆Die lewendige voël moet hy neem, en die stukkie sederhout, die karmosynrooi toutjie en die marjoleintakkie saam met die lewendige voël doop in die bloed van die ander voël waarvan die kop oor vars water afgesny is. ₇Hy moet die bloed sewe maal sprinkel oor die persoon wat hom van die velsiekte wil laat reinig en hom dan rein verklaar. Daarna moet hy die lewendige voël oor die oop veld loslaat. ₈Die een wat hom wil laat reinig, moet sy klere was, al sy hare afskeer en homself met water afspoel. Hy is dan rein en mag daarna in die kamp kom, maar hy moet sewe dae lank buite sy tent bly. ₉Op die sewende dag moet hy weer al sy hare afskeer – sy kop, sy baard en sy wenkbroue. Ja, hy moet al sy hare afskeer. Hy moet sy klere was en sy lyf met water afspoel. Hy is dan rein. ₁₀Op die agtste dag moet hy twee jong ramme sonder gebrek en een jaaroud ooitjie sonder gebrek neem, asook 'n •graanoffer van drie tiendes van 'n efa gesifte meel wat met olyfolie gemeng is en een log olyfolie. ₁₁Die priester wat die reiniging voltrek, moet die man wat hom wil laat reinig daarmee voor die Here laat staan by die ingang van die •Tent van Ontmoeting. ₁₂Die priester moet een van die jong ramme neem en dit saam met die log olyfolie naderbring as 'n •hersteloffer. Hy moet dit voor die Here as 'n gewyde gawe heen en weer beweeg. ₁₃Die man moet die jong ram keelaf sny waar die •reinigingsoffer en die •brandoffer keelaf gesny word, op 'n heilige plek, want soos die reinigingsoffer, kom die hersteloffer die priester toe. Dit is besonder heilig. ₁₄Die priester moet van die hersteloffer se bloed neem en dit aan die persoon wat hom wil laat reinig se regteroorlel, regterduim en regtergroottoon smeer. ₁₅Daarna moet die priester die log olyfolie neem en daarvan in die palm van sy linkerhand uitgooi. ₁₆Die priester moet sy regterwysvinger in die olyfolie in sy linkerpalm doop en met sy vinger sewe maal daarvan voor die Here sprinkel. ₁₇Van die olyfolie wat in sy handpalm oor is, moet die priester aan die persoon wat hom wil laat reinig se regteroorlel, regterduim en regtergroottoon, bo-oor die bloed van die hersteloffer, smeer. ₁₈Die res van die olyfolie in die priester se handpalm moet hy aan die persoon wat hom wil laat reinig, se kop smeer en sodoende vir hom versoening doen voor die Here. ₁₉Die priester moet dan die reinigingsoffer bring en versoening doen vir die een wat hom van sy •onreinheid wil laat reinig. Daarna moet hy die brandoffer keelaf sny. ₂₀Die priester moet die brandoffer en graanoffer op die altaar offer. So doen die priester vir hom versoening. Hy is dan rein.

₂₁“Maar as die persoon arm is en dit nie kan bekostig nie, moet hy vir 'n hersteloffer een jong ram as gewyde gawe neem om vir hom versoening te doen, asook 'n tiende van 'n efa gesifte meel wat met olyfolie gemeng is as graanoffer, 'n log olyfolie daarby, ₂₂en twee tortelduiwe of twee jong duiwe – wat hy ook al kan bekostig – een as reinigingsoffer en die ander as brandoffer. ₂₃Hy moet dit op die agtste dag van sy reiniging na die priester bring by die ingang van die Tent van Ontmoeting, daar voor die Here. ₂₄Die priester moet die jong ram vir die hersteloffer en die log olyfolie neem en dit voor die Here as 'n gewyde gawe heen en weer beweeg. ₂₅Die man moet die jong ram vir die hersteloffer keelaf sny en die priester moet van die bloed van die hersteloffer neem en dit aan die een wat hom wil laat reinig se regteroorlel, regterduim en regtergroottoon smeer. ₂₆Die priester moet van die olyfolie in sy linkerhandpalm uitgooi ₂₇en met sy regterwysvinger moet hy van die olyfolie in sy linkerhandpalm sewe maal voor die Here sprinkel. ₂₈Die priester moet van die olyfolie wat in sy handpalm is aan die een wat hom wil laat reinig se regteroorlel, regterduim en regtergroottoon, bo-oor die bloed van die hersteloffer, smeer. ₂₉Die res van die olyfolie in die priester se handpalm moet hy aan die persoon wat hom wil laat reinig, se kop smeer en sodoende vir hom versoening doen voor die Here. ₃₀Die priester moet een elk van die tortelduiwe of van die jong duiwe as offer bring – wat die man ook al kan bekostig – ₃₁een as 'n reinigingsoffer en die ander as 'n brandoffer, saam met die graanoffer. So doen die priester vir die persoon wat hom wil laat reinig versoening voor die Here. ₃₂Dit is die voorskrifte vir iemand met velsiekte wat nie die offers vir sy reiniging kan bekostig nie.”

₃₃Die Here het met Moses en Aäron gepraat en vir hulle gesê: ₃₄“Wanneer julle in Kanaän kom, die land wat Ek vir julle as besitting gaan gee, en Ek tref 'n huis in dié land van julle met 'n skimmelplaag, ₃₅moet die persoon aan wie die huis behoort, kom en vir die priester sê, ‘Dit lyk vir my daar is 'n skimmelplaag in die huis.’ ₃₆Die priester moet opdrag gee dat die huis ontruim word voordat hy daar ingaan om die skimmelplaag te ondersoek, om te verhoed dat alles wat in die huis is, onrein word. Daarna kan die priester ingaan om die huis te ondersoek. ₃₇As hy die skimmelplaag ondersoek en vind dat dit teen die mure van die huis groenerige of rooierige holtes maak wat lyk of dit onder die muur se oppervlak lê, ₃₈moet die priester by die huis uitgaan na die ingang van die voorhof, en die huis sewe dae lank toesluit. ₃₉Op die sewende dag moet die priester terugkeer. As hy die huis ondersoek en vind dat die skimmelplaag teen die mure van die huis versprei het, ₄₀moet die priester opdrag gee dat die klippe waarop die skimmelplaag is, verwyder en buite die stad op 'n onrein plek weggegooi word. ₄₁Die huis se mure moet hy aan die binnekant reg rondom laat afskraap en die afgeskraapte grond moet buite die stad op 'n onrein plek weggegooi word. ₄₂Dan moet hulle ander klippe neem en in die plek van daardie klippe inbou. Hulle moet ook ander klei neem en die huis daarmee pleister.

₄₃“Maar as die skimmelplaag weer in die huis uitslaan nadat die klippe uitgebreek en die huis afgeskraap en oorgepleister is, ₄₄moet die priester in die huis ingaan. As hy die huis ondersoek en vind dat die plaag versprei het, is daar skadelike skimmel in die huis; dit is onrein. ₄₅Die huis moet afgebreek word en die klippe, die hout en al die los grond van die huis moet buite die stad op 'n onrein plek weggegooi word. ₄₆Enigiemand wat die huis binnegaan gedurende die tyd wat dit gesluit is, sal tot die aand toe onrein wees. ₄₇Iemand wat in die huis slaap, moet sy klere was en iemand wat in die huis eet, moet ook sy klere was.

₄₈“As die priester egter in die huis ingaan en dit ondersoek en vind dat die skimmelplaag, nadat die huis gepleister is, nie versprei het nie, moet hy die huis rein verklaar omdat die skimmelplaag opgeklaar het. ₄₉Om die huis te reinig, moet hy twee voëls, 'n stukkie sederhout, 'n karmosynrooi toutjie en 'n marjoleintakkie neem. ₅₀Die een voël se kop moet hy oor 'n kleipot met vars water afsny. ₅₁Hy moet die stukkie sederhout, die marjoleintakkie, die karmosynrooi toutjie en die lewendige voël neem en dit doop in die vars water en die bloed van die voël waarvan die kop afgesny is. Hy moet dan die huis sewe keer besprinkel. ₅₂So moet hy die huis reinig met die bloed van die voël en die vars water, met die lewendige voël, die stukkie sederhout, die marjoleintakkie en die karmosynrooi toutjie. ₅₃Die lewendige voël moet hy buite die stad in die oop veld loslaat. So sal hy versoening doen vir die huis. Dit sal dan rein wees.

₅₄“Dit is die voorskrifte vir enige geval van velsiekte en uitslag, ₅₅vir skimmel op klere en in 'n huis, ₅₆vir 'n swelsel, 'n skurwe plek en 'n ligte vlek, ₅₇om te kan vasstel wanneer iets onrein is en wanneer dit rein is.

“Dit dan wat betref die voorskrifte oor velsiekte en skimmel.”