Job 8

₂“Hoe lank nog gaan jy hierdie dinge beweer?

Die woorde van jou mond is bloot 'n groot klomp wind.

₃Sal God die reg verdraai,

of sal die Almagtige

geregtigheid verdraai?

₄As jou kinders teen Hom gesondig het,

het Hy hulle aan hulle oortreding oorgelaat.

₅As jy self God egter ywerig soek

en by die Almagtige pleit;

₆as jy onbesproke en opreg is,

ja, dan sal Hy oor jou waak,

dan sal Hy jou regmatige verblyf herstel.

₇En al was jou verlede gering,

sal jou toekoms baie voorspoedig wees.

₈“Ja, gaan doen maar navraag

by die vorige geslag;

stel vas wat hulle voorouers

reeds noukeurig ondersoek het.

₉Ons is immers van gister

en ons weet niks nie;

ja, ons lewensdae is net 'n skaduwee op aarde.

₁₀Sal húlle jou nie onderrig nie,

met jou praat nie,

uit hulle harte argumente aanvoer nie?

₁₁Sal papirus hoog groei

waar daar nie 'n moeras is nie?

Sal oewergras gedy

waar daar nie water is nie?

₁₂Dit is nog besig om te groei,

is nog nie gesny nie,

dan verwelk dit al –

voor al die ander grasse.

₁₃So loop die paaie van almal

wat van God vergeet:

Die hoop van die godloses gaan tot niet –

₁₄hy wat sy hoop vestig op dun spinnerakdrade,

wat in 'n spinnerak sy vertroue stel.

₁₅As hy teen sy huis leun,

bly dit nie staan nie;

as hy daaraan vasgryp,

hou dit nie stand nie.

₁₆Hy is 'n plant vol sap in die son,

sy ranke brei uit deur sy tuin.

₁₇Sy wortels raak vervleg met kliphope,

hy is op die uitkyk vir 'n tuiste van klip.

₁₈As hy uit sy plek gepluk word,

verloën sy plek hom met,

‘Ek het jou nie gesien nie.’

₁₉Kyk, dit is die vreugde van sy lewenspad,

en uit die grond spruit daar 'n ander een.

₂₀“Kyk, God verwerp nie iemand

wat onberispelik optree nie;

Hy versterk nie die hand van kwaaddoeners nie.

₂₁Hy sal weer jou mond vul met gelag,

jou lippe met 'n vreugdekreet.

₂₂Hulle wat jou haat,

sal met skande bedek wees;

en die tentwoning van die goddeloses

sal nie meer daar wees nie.”