Hosea 7

₁terwyl Ek Israel genees,

kom die sondeskuld van Efraim

en die booshede van Samaria

aan die lig.

Ja, hulle het vals opgetree:

Diewe breek in,

en op straat plunder rowerbendes.

₂Hulle dink nie eers daaraan

dat Ek al hulle boosheid

in gedagte hou nie.

Nou het hulle dade hulle ingehaal;

dit lê oop en bloot voor My.”

₃“Met hulle boosheid

verheug hulle die koning,

en met hulle leuens, leiers;

₄hulle is almal ontroues.

Dit is soos 'n oond wat bly smeul,

soos wanneer die bakker

ophou vuurmaak,

vandat die deeg geknie is

totdat dit uitgerys het.

₅Op die dag van ons koning

het hulle die leiers bedwelm

met die gloed van wyn;

dit het die raadgewers

in sy mag meegevoer.

₆Toe hulle hulde betoon het,

was hulle harte soos 'n oond,

terwyl hulle 'n hinderlaag opstel.

Die hele nag sluimer hulle drif;

teen die môre vlam dit op soos 'n vuur.

₇Hulle het almal gegloei soos 'n oond;

hulle het hulle heersers verteer;

al hulle konings het tot 'n val gekom.

Daar is onder hulle nie een

wat na My roep nie.”

₈“Efraim is onder die nasies,

hy word self geknie.

Efraim het geword soos 'n roosterkoek

wat nie omgedraai is nie.

₉Vreemdes het sy kragte verteer,

maar hy besef dit nie.

Hy het ook grys geword,

maar hy besef dit nie.

₁₀Israel se hoogmoed getuig teen hom,

maar hulle keer nie terug

na die Here hulle God nie;

te midde van dit alles

soek hulle Hom nie op nie.

₁₁Efraim het geword soos 'n duif –

dom en sonder verstand.

Hulle het vir Egipte gekoer,

maar na Assirië gevlieg.

₁₂Wanneer hulle vlieg,

sprei Ek my vangnet oor hulle uit.

Soos voëls van die hemel

sal Ek hulle neertrek.

Ek sal hulle vang soos iemand

wat vir die swerm luister.

₁₃Wee hulle,

want hulle vlug weg van My af.

Verwoesting wag op hulle,

want hulle het teen My oortree.

Ek wou hulle verlos,

maar hulle het leuens oor My vertel.

₁₄Hulle roep nie uit die hart

na My om hulp nie;

want hulle kerm op hulle lêplekke;

oor koring en •nuwe wyn sny hulle

hulleself stukkend –

so draai hulle teen My.

₁₅Ek is die Een wat hulle geleer het.

Ek het hulle arms sterk gemaak,

maar teen My beplan hulle kwaad.

₁₆Hulle keer terug na wat nutteloos is;

hulle het soos 'n slap boog geword.

Hulle leiers sal deur die swaard val

oor die vervloeking

wat hulle uitgespreek het.

Dit sal hulle bespotting wees

in Egipteland.