Eksodus 38

₁Hy het die brandofferaltaar van doringhout gemaak, vyf el lank en vyf el breed; dit was vierkantig, en drie el hoog. ₂Hy het die horings daarvan op die vier hoeke gemaak. Die horings was deel daarvan, en hy het die altaar met brons oorgetrek. ₃Hy het al die toebehore van die altaar gemaak, die houers, skoppies, offerbakke, vurke en vuurpanne. Al die toebehore het hy van brons gemaak. ₄Hy het vir die altaar 'n traliewerk gemaak, 'n maaswerk van brons, onder die rand, met die onderkant daarvan tot by die helfte van die altaar. ₅Hy het vier ringe aan die vier hoeke van die bronstraliewerk gegiet as houers vir die draaghoute. ₆Hy het die draaghoute van doringhout gemaak en dit met brons oorgetrek. ₇Hy het die draaghoute deur die ringe aan die kante van die altaar gesteek om dit daarmee te dra. Hy het die altaar van planke gemaak, hol aan die binnekant.

₈Hy het die bronswaskom en sy bronsvoetstuk gemaak van die spieëls van die vroue wat aan diens was by die ingang van die •Tent van Ontmoeting.

₉Hy het ook die binneplein gemaak. Aan die suidekant was die behangsels vir die binneplein van fyn dubbeldraadlinne, 'n honderd el lank. ₁₀Daar was twintig staanders met hulle twintig bronsvoetstukke, maar die hakies van die staanders en hulle hegplekke was van silwer. ₁₁Aan die noordekant, oor 'n lengte van honderd el, was daar twintig staanders met hulle bronsvoetstukke, en die hakies en die hegplekke van die staanders was van silwer. ₁₂Aan die westekant was daar vyftig el behangsels, tien staanders met hulle tien voetstukke en die hakies van die staanders, en hulle hegplekke was van silwer. ₁₃Aan die oostekant was dit vyftig el wyd. ₁₄Die behangsels langs die ingang was vyftien el, met drie staanders en hulle drie voetstukke – ₁₅so ook langs die ander kant. So was daar aan elke kant van die ingang na die binneplein behangsels van vyftien el, met drie staanders en drie voetstukke. ₁₆Al die behangsels rondom die binneplein was van fyn dubbeldraadlinne. ₁₇Die voetstukke van die staanders was van brons, die hakies en hegplekke van die staanders was van silwer, die plaatwerk aan die bopunte was van silwer. Die staanders is van silwerhegplekke voorsien, al die staanders van die binneplein. ₁₈Die gordyn by die ingang van die binneplein is van pers, purperrooi en karmosynrooi wol en fyn dubbeldraadlinne gemaak – met die kundigheid van 'n borduurder. Dit was twintig el lank en die hoogte oor die volle breedte was vyf el, in ooreenstemming met die behangsels van die binneplein. ₁₉Die vier staanders en vier voetstukke was van brons. Hulle hakies was van silwer, en die plaatwerk aan die bopunte en hulle hegplekke was van silwer. ₂₀Al die tentpenne rondom die •tabernakel en die binneplein was van brons.

₂₁Dít is die inventaris van die tabernakel – die tabernakel met die Getuienis – wat in opdrag van Moses opgestel is deur die Leviete onder leiding van Itamar, seun van Aäron, die priester. ₂₂Besaleël, seun van Uri, seun van Gur, van die stam van Juda, het alles gemaak wat die Here Moses beveel het. ₂₃Saam met hom was Oholiab, seun van Agisamag, van die stam van Dan, 'n vakman en ontwerper, 'n borduurder van pers, purperrooi en karmosynrooi wol en fyn linnedraad.