2 Kronieke 27

₁Jotam was vyf-en-twintig jaar oud toe hy koning geword het, en hy het sestien jaar lank as koning geheers in Jerusalem. Sy moeder se naam was Jerusa, dogter van Sadok. ₂Hy het gedoen wat reg is in die oë van die Here, net soos sy vader Ussia gedoen het – hy het net nie die •tempel van die Here binnegegaan nie. Die volk het hulle egter steeds wangedra. ₃Dit is hy wat die boonste poort van die huis van die Here gebou het. Aan die muur by die Ofel het hy baie bouwerk gedoen. ₄Dorpe is deur hom in die bergland van Juda gebou, en in die beboste gebied het hy vestingstede en wagtorings gebou. ₅Hy is ook die een wat teen die koning van die Ammoniete geveg en hulle oorweldig het. Die Ammoniete het daardie jaar vir hom 'n honderd kikkar silwer, tienduisend kor koring en tienduisend kor gars gegee. Dieselfde hoeveelheid het die Ammoniete ook in die tweede en derde jaar aan hom gelewer. ₆Jotam het sy mag stewig gevestig, want hy het sy pad koersvas geloop voor die Here sy God.

₇Die verdere geskiedenis van Jotam, al sy oorloë en ondernemings, kyk, dit is opgeteken in die boekrol van die konings van Israel en Juda. ₈Hy was vyf-en-twintig jaar oud toe hy koning geword het, en hy het sestien jaar lank as koning geheers in Jerusalem. ₉Jotam het by sy voorouers gaan rus, en hulle het hom in die •Stad van Dawid begrawe. Agas, sy seun, het in sy plek koning geword.