2 Kronieke 26

₁Die hele volk van Juda het toe vir Ussia – hy was sestien jaar oud – geneem en hom koning gemaak in die plek van sy vader, Amasia. ₂Hy is die een wat Elat herbou en teruggebring het onder Juda se beheer nadat die koning by sy voorouers gaan rus het. ₃Ussia was sestien jaar oud toe hy koning geword het, en hy het twee-en-vyftig jaar lank as koning geheers in Jerusalem. Sy moeder se naam was Jegolja, uit Jerusalem. ₄Hy het gedoen wat reg is in die oë van die Here, net soos sy vader Amasia gedoen het. ₅Hy het God altyd gesoek in die tyd van Sagaria, die een wat hom insig gegee het in ontsag vir God. So lank as wat hy die Here gesoek het, het God hom sukses laat behaal.

₆Hy het uitgetrek, teen die Filistyne geveg, en bresse geslaan in die stadsmure van Gat, Jabne en Asdod. Hy het dorpe gebou by Asdod en tussen die Filistyne. ₇God het hom gehelp teen die Filistyne, die Arabiere wat in Gur-Baäl gewoon het, en teen die Meüniete. ₈Die Ammoniete moes aan Ussia belasting betaal. Sy roem het so ver as die grens van Egipte gestrek, want hy het baie magtig geword. ₉Ussia het wagtorings gebou in Jerusalem by die Hoekpoort, die Dalpoort en die Hoek; en hy het dit versterk. ₁₀Hy het wagtorings in die woestyn gebou en baie opgaarputte gegrawe, want hy het baie vee gehad in sowel die Sjefela as op die vlakte. Hy het plaaswerkers en wingerdwerkers in die bergland en op vrugbare grond gehad, want hy was lief vir landbou.

₁₁Ussia het 'n leër gehad wat oorlog kon voer, wat as troepe op 'n veldtog kon uittrek, ooreenkomstig die getal van hulle monstering deur Jeïel, die sekretaris, en Maäseja, die opsiener onder bevel van Gananja, een van die koning se bevelvoerders. ₁₂Die volle getal van die familiehoofde, van die dapper krygers, was tweeduisend seshonderd. ₁₃Onder hulle bevel was daar 'n leër van driehonderd-en-seweduisend vyfhonderd wat met groot slaankrag oorlog kon voer om die koning by te staan teen die vyand. ₁₄Ussia het hulle, die hele leër, voorsien van kleinskilde, steekspiese, helms, harnasse, boë en klippe vir slingervelle. ₁₅In Jerusalem het hy oorlogstuig, die uitvindsel van deskundiges, gemaak vir die torings en hoeke van die stadsmuur om pyle en groot klippe te skiet. Sy roem het ver versprei, want hy is wonderbaarlik gehelp totdat hy so sterk was.

₁₆Maar toe hy magtig geword het, het sy hart hoogmoedig geraak, tot sy eie ondergang. Hy was ontrou aan die Here sy God en het die •tempel van die Here binnegegaan om reukwerk te verbrand op die altaar vir die reukwerk. ₁₇Die priester Asarja het hom na binne gevolg. Saam met hom was daar tagtig priesters van die Here, onverskrokke manne. ₁₈Hulle het Ussia, die koning, teengestaan en vir hom gesê: “Dit is nie vir u, Ussia, beskore om reukwerk te laat brand vir die Here nie, maar vir die priesters, die nageslag van Aäron, wat geheilig is om reukwerk te laat brand. Gaan uit die heiligdom uit, want u was ontrou! Dit sal u nie tot eer strek by die Here God nie.”

₁₉Ussia was onbeheersd kwaad. Terwyl hy met die pan met reukwerk in sy hand, gereed om reukwerk te laat brand, sy onbeheersde woede op die priesters uithaal, het 'n velsiekte daar voor die priesters, langs die altaar vir die reukwerk in die huis van die Here, op sy voorkop uitgeslaan. ₂₀Toe Asarja, die hoëpriester, en al die priesters na hom draai, het hy sowaar 'n velsiekte op sy voorkop! Hulle het hom inderhaas daar verwyder. Hy was self ook haastig om uit te gaan, omdat die Here hom getref het.

₂₁Koning Ussia het 'n velsiekte gehad tot die dag van sy dood. Hy het in 'n plek van afsondering gewoon, want hy was verban uit die huis van die Here. Jotam, sy seun, het beheer gehad oor die koninklike paleis en het reg gespreek oor die volk van die land.

₂₂Die verdere geskiedenis van Ussia, die vroeëre en latere geskiedenis, het die profeet Jesaja, seun van Amos, opgeteken. ₂₃Ussia het by sy voorouers gaan rus, en hulle het hom by sy voorouers begrawe in die veld by die graf wat aan die konings behoort, want hulle het gesê: “Hy het 'n velsiekte.” Sy seun Jotam het in sy plek koning geword.