2 Kronieke 23

Jojada het vir hulle gesê: “Kyk, 'n seun van die koning moet, soos die Here beloof het, regeer oor die nageslag van Dawid. ₄Dit is wat julle moet doen: 'n Derde van julle wat op die Sabbat aan diens is, naamlik die priesters en Leviete, moet by die drumpels wagstaan, ₅'n derde by die koninklike paleis, en 'n derde by die Fondamentpoort. Die hele volk moet in die voorhowe van die huis van die Here wees. ₆Niemand mag die huis van die Here binnegaan nie, behalwe die priesters en diegene van die Leviete wat diens doen. Net hulle mag ingaan, omdat hulle gewy is. Die hele volk moet egter die verpligtinge teenoor die Here nakom. ₇Die Leviete moet reg rondom die koning stelling inneem, elkeen met sy wapens in sy hand. Enigeen wat die •tempel binnegaan, moet doodgemaak word. Julle moet by die koning wees wanneer hy ingaan en uitgaan.”

₈Die Leviete en die hele Juda het gemaak net soos die priester Jojada beveel het. Elkeen het sy manne geneem, dié wat aan diens was op die Sabbat en dié wat van diens af was op die Sabbat, want die priester Jojada het nie die afdelings afgegee nie. ₉Die priester Jojada het vir die aanvoerders van honderd die vegspiese, kleinskilde en ook rondeskilde wat aan koning Dawid behoort het, en in die huis van God was, gegee. ₁₀Hy het al die manskappe, elkeen met sy wapen in sy hand, vanaf die regterkant van die tempel tot aan die linkerkant van die tempel laat staan, voor die altaar en voor die tempelgebou, rondom die koning. ₁₁Toe bring hulle die seun van die koning uit en plaas die kroon en koninklike simbole op hom. So het hulle hom koning gemaak. Jojada en sy seuns het hom gesalf en uitgeroep: “Lank lewe die koning!”

₁₂Toe Atalia die uitroepe hoor van die volk wat naderhardloop en die koning se lof besing, het sy na die volk in die huis van die Here gegaan. ₁₃Sy sien toe, sowaar, daar staan die koning by sy pilaar by die ingang, en die aanvoerders met die trompette is by die koning, terwyl die hele volk van die land verheug is, op trompette blaas, en die sangers met musiekinstrumente voorgaan in die lofprysing. Toe skeur Atalia haar klere en roep uit: “Verraad! Verraad!”

₁₄Die priester Jojada het toe aanvoerders van honderd, die bevelvoerders van die leër, laat uitgaan en vir hulle gesê: “Neem haar buite die kordon. Dié wat haar volg, moet met die swaard doodgemaak word.” Ja, die priester het gesê: “Julle mag haar nie in die huis van die Here doodmaak nie.” ₁₅Hulle het haar beetgepak, en toe sy die ingang van die Perdepoort by die koninklike paleis bereik, is sy daar doodgemaak.

₁₆Jojada het 'n verbond gesluit tussen homself, die hele volk en die koning dat hulle die volk van die Here sal wees. ₁₇Die hele volk van die land het toe die tempel van Baäl binnegegaan en dit afgebreek. Sy altare en sy beelde het hulle stukkend gebreek, en vir Mattan, die priester van Baäl, het hulle voor die altare doodgemaak.

₁₈Jojada het die toesig oor die huis van die Here in die hande van die Levitiese priesters gelaat, dié wat Dawid ingedeel het by die huis van die Here om •brandoffers vir die Here te bring, soos daar geskryf staan in die Wet van Moses, en “met vreugderoepe en sang”, soos aangewys deur Dawid. ₁₉Jojada het die poortwagte laat aantree by die poorte van die huis van die Here, sodat niemand wat in enige opsig •onrein was, kon ingaan nie. ₂₀Hy het die aanvoerders van honderd, die magtiges, die heersers onder die volk en die hele volk van die land geneem en die koning uit die huis van die Here afgebring. Hulle het die koninklike paleis deur die Boonste Poort binnegegaan en die koning op die koninklike troon laat plaasneem. ₂₁Die hele volk van die land was verheug, en die stad was rustig, al het hulle Atalia met die swaard doodgemaak.