1 Korinthiërs 16

₁Wat die insameling vir die •heiliges betref: Die reëling wat ek in die •gemeentes van Galasië getref het, moet julle ook so uitvoer. ₂Elkeen van julle afsonderlik moet op die eerste dag van die week 'n bedrag opsy sit, en volgens sy verdienste spaar, sodat die insamelings nie eers plaasvind wanneer ek kom nie. ₃Wanneer ek opdaag, sal ek, wie julle ook al goedkeur, met aanbevelingsbriewe stuur om julle gawes na Jerusalem te neem. ₄Indien dit die moeite werd is dat ek ook gaan, kan hulle my vergesel.

₅Ek sal na julle kom as ek deur Macedonië gereis het, want ek gaan deur Macedonië reis. ₆Moontlik sal ek 'n tyd by julle oorbly, of selfs oorwinter, sodat julle my kan voorthelp waarheen ek ook al mag gaan. ₇Want ek wil julle nie nou net in die verbygaan sien nie; ek hoop immers om 'n tyd lank by julle te bly, indien die Here dit toelaat. ₈Ek sal egter tot Pinkster in Efese bly, ₉want 'n deur het groot en kragtig vir my oopgegaan, hoewel daar baie teenstanders is.

₁₀As Timoteus kom, sorg dat hy by julle niks te vrees het nie, want soos ek, doen hy ook die werk van die Here; ₁₁daarom moet niemand hom minag nie. Help hom in vrede om na my te kom, want ek verwag hom saam met die broers.

₁₂En oor die broer Apollos: Ek het hom herhaaldelik versoek om saam met die broers na julle te gaan, maar hy wil beslis nie nou gaan nie. Hy sal gaan wanneer dit vir hom geleë is.

₁₃Wees waaksaam, staan vas in die geloof, wees manhaftig, wees sterk. ₁₄Laat alles wat julle doen, in liefde geskied. ₁₅Ek rig nog 'n ernstige versoek tot julle, broers. Julle weet dat Stefanas en sy huisgesin die eerstelinge in Agaje is, en hulleself tot diens van die •heiliges gestel het. ₁₆Onderwerp julle aan die leiding van sulke mense, en aan elkeen wat saamwerk en hom inspan. ₁₇Ek is bly oor die koms van Stefanas, Fortunatus en Agaïkus, want hulle het vergoed vir my gemis aan julle. ₁₈Hulle het my gees verkwik en julle s'n ook. Gee daarom erkenning aan sulke mense.

₁₉Die •gemeentes in Asië groet julle. Akwila en Priska, en die gemeente wat in hulle huis bymekaarkom, stuur vir julle baie groete in die Here. ₂₀Al die broers groet julle. Groet mekaar met 'n heilige soen. ₂₁Dié groetwoord in my eie handskrif: Van Paulus. ₂₂As iemand die Here nie liefhet nie, laat hom vervloek wees. Marana ta!

₂₃Die genade van die Here Jesus bly met julle! ₂₄My liefde bly met julle almal in •Christus Jesus.