1 Kronieke 10

₁Intussen het die Filistyne teen Israel geveg en die manne van Israel het voor die Filistyne uit gevlug; die gesneuweldes het op die berg van Gilboa gelê. ₂Die Filistyne het op Saul en sy seuns se hakke gebly, en die Filistyne het Jonatan, Abinadab en Malkisua, Saul se seuns, neergevel. ₃Die geveg het verhewig teen Saul, en die boogskutters het op hom afgekom. Hy het gebewe van angs vir die boogskutters. ₄Saul sê toe vir sy wapendraer: “Trek jou swaard en deurboor my daarmee, anders kom hierdie onbesnedenes en martel my.” Maar sy wapendraer wou nie, want hy was angsbevange. Toe vat Saul sy swaard en val daarin. ₅Toe sy wapendraer sien dat Saul dood is, val ook hy in sy swaard en sterf. ₆So het Saul en sy drie seuns gesterf. Sy hele gesin het saam gesterf.

₇Toe al die manne van Israel wat in die vallei was, sien dat hulle gevlug het, en dat Saul en sy seuns dood is, het hulle hulle dorpe verlaat en gevlug. Die Filistyne het toe gekom en daar gaan woon.

₈Die volgende dag, toe die Filistyne kom om die gesneuweldes te plunder, kry hulle Saul en sy drie seuns waar hulle op die berg van Gilboa lê. ₉Hulle het hom kaalgestroop en sy kop en sy wapens gevat. Hulle het boodskappers in die land van die Filistyne rondgestuur om die goeie nuus aan hulle afgode en die volk te bring. ₁₀Daarna het hulle sy wapens in die tempel van hulle god neergesit, en sy kopbeen het hulle in die tempel van Dagon vasgeslaan.

₁₁Toe almal by Jabes in Gilead alles hoor wat die Filistyne Saul aangedoen het, ₁₂het al die bekwame manne gereedgemaak en Saul en sy seuns se lyke opgetel en hulle na Jabes geneem. Hulle het hulle beendere onder die terebintboom by Jabes begrawe en sewe dae lank gevas.

₁₃Saul het gesterf vanweë sy troubreuk wat hy teen die Here gepleeg het, aangesien hy die woord van die Here nie nagekom het nie, en omdat hy boonop by die gees van 'n dooie navraag gedoen en dié geraadpleeg het. ₁₄Hy het nie die Here geraadpleeg nie, en Hy het hom laat sterf. Hy het die koningskap laat oorgaan na Dawid, seun van Isai.